*অসম মাইক্ৰোফাইনেন্স উদগনি আৰু সকাহ আঁচনি - ২০২১ ৰ অধীনত 'বকেয়া নথকাৰ প্ৰমাণপত্ৰ ' বিতৰণী অনুষ্ঠান*

১৬ অক্টোবৰ, ২০২৩: গোলাঘাট

*অসম মাইক্ৰোফাইনেন্স উদগনি আৰু সকাহ আঁচনি - ২০২১ ৰ অধীনত 'বকেয়া নথকাৰ প্ৰমাণপত্ৰ ' বিতৰণী অনুষ্ঠান*

           আজি গোলাঘাট জিলা প্ৰশাসনৰ উদ্যোগত গোলাঘাট জিলাৰ সমন্বয় ক্ষেত্ৰত ৰাজ্যৰ কৃষি, পশুপালন ইত্যাদি বিভাগৰ মাননীয় মন্ত্ৰী  অতুল বৰাৰ উপস্থিতিত "অসম মাইক্ৰ'ফাইনেন্স উদগনি আৰু সকাহ আঁচনি ২০২১"ৰ অধীনত বিভিন্ন সংস্থাৰ পৰা ঋণ লোৱা জিলাখনৰ ঋণী মহিলাসকলক 'বকেয়া নথকা প্ৰমাণ-পত্ৰ' প্ৰদান  আনুষ্ঠানিকভাৱে শুভাৰম্ভ কৰা হয়।

             অনুস্থানটোৰ মূখ্য অতিথি মাননীয় মন্ত্ৰী অতুল বৰাই ক্ষুদ্ৰ বিত্তীয় প্ৰতিষ্ঠানৰপৰা ঋণ গ্ৰহণ কৰি অসুবিধাৰ সন্মুখীন হৈ থকা ঋণগ্ৰস্ত মহিলাসকলক সকাহ প্ৰদানৰ লক্ষ্যৰে অসম চৰকাৰে ২০২১ চনত গ্ৰহন কৰা এই বৃহৎ আঁচনিখনৰ বাবেই আজি অসমৰ মহিলাসকলে মাইক্ৰ'ফাইনেন্সৰ ঋণৰ বোজাৰ পৰা উদ্ধাৰ পাবলৈ সক্ষম হৈছে বুলি উল্লেখ কৰে।  মন্ত্ৰীগৰাকীয়ে লগতে কয় যে অসম চৰকাৰে মহিলা সবলীকৰণত যথেষ্ট অগ্ৰাধিকাৰ দি উন্নয়নৰ এক নৱজাগৰণৰ সৃষ্টি কৰিছে। চৰকাৰে গ্ৰহণ কৰা  এনে ধৰনৰ পদক্ষেপে মহিলা সকলক আৰ্থিকভাৱে যথেষ্ট সকাহ দিবলৈ সক্ষম হৈছে বুলি তেখেতে জনায়।

           উল্লেখযোগ্য যে,এই আচঁনিত ৩টা পৰ্য্যন্ত ল’ন দিয়া হৈছে আৰু ১.২৫ লাখ টকালৈকে ঋন লোৱা সকলক সামৰি লোৱা হৈছে৷ অনুস্থানটিত সৰুপথাৰ সমষ্টিৰ বিধায়ক  বিশ্বজিৎ ফুকনেও এই আচনিখনৰ সবল দিশ সমূহৰ ওপৰত বক্তব্য আগবঢায়।গোলাঘাট জিলাৰ আয়ুক্ত ডাঃ পি উদয় প্ৰৱীণে আদৰণি ভাষনত এই আঁচনিখনৰ তৃতীয় পৰ্যায়ত গোলাঘাট জিলাৰ ১৯,৩৫২ গৰাকী মহিলা উপকৃত হ'ব বুলি জনায়।

            আজিৰ অনুষ্ঠানত সৰুপথাৰৰ  বিধায়ক  বিশ্বজিৎ ফুকন, গোলাঘাটৰ জিলা উন্নয়ন আয়ুক্ত  অৰ্পা বাগলাৰী, গোলাঘাট জিলা পৰিষদৰ অধ্যক্ষা  হেলিনা দলে পেগু, জিলা পৰিষদৰ মুখ্য কাৰ্যবাহী বিষয়া  ধীৰাজ দাস, গোলাঘাট জিলা বিজেপি আৰু অগপৰ সভাপতিদ্বয় দেৱপ্ৰদীপ বৰা আৰু ড° নৃপেন বৰুৱা, গোলঘাট পৌৰসভাৰ পৌৰনেত্ৰী দুলুমণি বৰবৰা, অতিৰিক্ত আয়ুক্ত  ৱাছবীৰ ছুভানী, গোলাঘাট সদৰৰ মহকুমাধিপতি পাপৰি দাস প্ৰমুখ্যে জিলা প্ৰশাসনৰ অন্যান্য বিষয়াসকল, বিশিষ্ট ব্যক্তিসকল, অসম মাইক্ৰ'ফাইনেন্স উদগনি আৰু সকাহ আঁচনিখনৰ হিতাধিকাৰীসকলৰ লগতে বহু সংখ্যক ৰাইজ উপস্থিত থাকে।

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট

NORTHEAST NEWS INDIA

কমাৰবন্ধা উচ্চতৰ মাধ্যমিক বিদ্যালয়ৰ খেলপথাৰত বক্ষ্ৰপূত্ৰ ভলীবল লীগৰ চতুৰ্থটো পৰ্য্যায়ৰ খেল সম্পন্ন

১৫ অক্টোবৰ, ২০২৩: গোলাঘাট

             আজি গোলাঘাট জিলাৰ কমাৰবন্ধা উচ্চতৰ মাধ্যমিক বিদ্যালয়ৰ খেলপথাৰত বক্ষ্ৰপূত্ৰ ভলীবল লীগৰ চতুৰ্থটো পৰ্য্যায়ৰ খেল সম্পন্ন

হয় ।  কমাৰবন্ধা ক্ৰীড়া সংস্থাই কমাৰবন্ধা ভলীবল প্ৰশিক্ষণ কেন্দ্ৰৰ সহযোগত আয়োজিত কৰা এই লীগ  উদ্ধোধন কৰে গোলাঘাট জিলাৰ জিলা আয়ুক্ত ড° পি উদয় প্ৰৱীণ মহোদয়ে ৷ প্ৰখ্যাত ভলীবল খেলুৱৈ আৰু ভাৰতৰ ৰাষ্ট্ৰীয় ভলীবল দলৰ প্ৰাক্তন কেপ্তেইন ৱাই চুব্বা ৰাও আৰু যশস্বী সাংবাদিক মৃণাল তালুকদাৰ মুখ্য  অতিথি হিচাপে থকা আজিৰ এই উদ্ধোধনী অনুষ্ঠানত কৃতী ভলীবল খেলুৱৈক সম্বৰ্ধনা জনোৱাৰ লগতে  লীগৰ খেলৰ আৰম্ভণি তথা কেইবাটাও সাংস্কৃতিক অনুষ্ঠানো কৰা হয়৷ 

             আজিৰ এই উদ্বোধনী অনুষ্ঠানত ভাৰতীয় ভলীবল দলৰ প্ৰাক্তন কেপ্তেইন শ্ৰী অভিজিত ভট্াচাৰ্য, অসম ক্ৰিকেট সংস্থাৰ  প্ৰাক্তন উপ-সভাপতি শ্ৰী পৰীক্ষিত দত্তক বিশেষভাৱে সম্বৰ্ধনা জ্ঞাপন কৰা হয়৷

              আজিৰ সভাত গোলাঘাটৰ জিলা আয়ুক্ত ডা° পি উদয় প্ৰৱীনে উদ্বোধনী ভাষণত উদ্যেক্তা সকলে লোৱা এই প্ৰচেষ্টাৰ ভূয়সী প্ৰশংসা কৰাৰ লগতে অসমৰ গাঁৱে ভূঁৱে যাতে এই লীগে প্ৰসাৰ লাভ কৰে আৰু সৰ্বভাৰতীয় পৰ্য্যায়ত জিলিকি উঠে সেয়া কামনা কৰে৷ সভাত উপস্থিত থকা বিশিষ্ট সাংবাদিক , লেখক মৃণাল তালুকদাৰে গ্ৰামাঞ্চলত এনে বিশাল আয়োজনেৰে ভলীবল লীগ অনুষ্ঠিত কৰা প্ৰয়াস দেখি অভিভূত হৈ পৰা বুলি বক্তব্য ৰাখে৷ সভাত উপস্থিত থকা প্ৰখ্যাত ভলীবল খেলুৱৈ ৱাই চুব্বা ৰাওয়ে গ্ৰামাঞ্চলৰ খেলুৱৈ সকলক উদগনি জনোৱাৰ লগতে আৰু আগবাঢ়ি  যোৱাৰ পৰামৰ্শ প্ৰদান কৰে৷ আজিৰ সভাত উপস্থিত থকা নুমলীগড় শোধনাগাৰৰ মুখ্য পৰিচালন সঞ্চালক ড° কাজল শইকীয়াই কমাৰবন্ধা ক্ৰীড়া সংস্থাৰ এই উদ্যেগক নুমলীগড় শোধনাগাৰ ৰ পৰা কিদৰে সহায় কৰা হৈছে আৰু আগলৈও উদগনি জনাবলৈ সাজু থকাৰ কথা তেখেতৰ ভাষণত উল্লেখ কৰে৷ 

               আজিৰ উদ্ধোধনী অনুষ্ঠানত গোলাঘাট ক্ৰীড়া সংস্থাৰ সভাপতি ডা° অজিত বৰুৱা, সম্পাদক শ্ৰী সঞ্জীৱ সন্দিকৈকে ধৰি কেইবাগৰাকীও বিশিষ্ট ব্যক্তি, খেলুৱৈ আৰু স্থানীয় ৰাইজ উপস্থিত আছিল৷ 

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট

 NORTHEAST NEWS INDIA

মোৰ মাটি মোৰ দেশ” ৰ অন্তৰ্গত অমৃত কলহ যাত্ৰা কাৰ্যসূচীৰ অনুষ্ঠান আয়োজন

১৫ অক্টোবৰ, ২০২৩: গোলাঘাট

           আজি গোলাঘাট জিলাৰ বীৰাংগনা সতী সাধনী কলাক্ষেত্ৰৰ সভাকক্ষত “মোৰ মাটি মোৰ দেশ” ৰ অন্তৰ্গত অমৃত কলহ যাত্ৰা কাৰ্যসূচীৰ অনুষ্ঠান আয়োজন

কৰা হয়৷  গোলাঘাট জিলাৰ সকলো পৌৰসভাৰ পৰা মাটি আনি আজিৰ অনুষ্ঠানত  একত্ৰিত কৰা হয়। এই অনুস্থানত অসম চৰকাৰৰ বিত্ত ইত্যাদি বিভাগৰ মন্ত্ৰী মাননীয়া শ্ৰীযুতা অজন্তা নেওঁগে মূখ্য অতিথি হিচাপে অংশগ্ৰহন কৰে। অনুস্থানত বোকাখাত, দেৰগাঁও, সৰুপথাৰ আৰু বৰপথাৰ পৌৰসভাৰ পৰা পৌৰপতি সকলৰ লগতে ভালে সংখ্যক লোকে মাটিৰ সৈতে শোভাযাত্ৰা কৰি অনুস্থানৰ উদ্যোক্তা হিচাপে থকা গোলাঘাট পৌৰসভাক যোগদান কৰে। অনুস্থানত মাননীয়া মন্ত্ৰী গৰাকীয়ে আনুস্থানিক ভাৱে সকলো পৌৰসভাৰ মাটি একগোট কৰি নিৰ্দিষ্ট পিতলৰ কলহত আগন্তুক যাত্ৰাৰ বাবে ভৰায়। উল্লেখযোগ্য যে পিতলৰ কলহৰ সৈতে এই মাটি পিছৰ পৰ্য্যায়ৰ কাৰ্যসূচীৰ অংশ হিচাপে দিল্লীলৈ লৈ যোৱা হ’ব৷ 

               আজিৰ সভাত ভাষণ দি মাননীয় মন্ত্ৰী গৰাকীয়ে অমৃত কলহ যাত্ৰাৰ দৰে মহৎ কাৰ্য্যক্ৰমৰ দ্বাৰা দেশৰ প্ৰতিজন নাগৰিকৰ মনত দেশপ্ৰেমৰ ভাৱ জগাই তুলিছে বুলি উল্লেখ কৰাৰ লগতে দেশৰ প্ৰতি জীৱন উৎচৰ্গা কৰা প্ৰতিগৰাকী শ্বহীদ আৰু বীৰক শ্ৰদ্ধাৰে সোঁৱৰে। মন্ত্ৰী গৰাকীয়ে লগতে প্ৰতিজন নাগৰিককে দাসত্বৰ মনোভাৱ ত্যাগ কৰি আত্মনিৰ্ভৰশীল হবলৈ আহ্বান জনায়। 

                   কাৰ্য্যক্ৰমৰ আৰম্ভনিতে গোলাঘাটৰ জিলা আয়ুক্ত ডাঃ পি উদয় প্ৰৱীণে আদৰনি ভাষণ আগবঢায়। আদৰণি ভাষণত জিলা আয়ুক্ত গৰাকীয়ে অমৃত কলহ যাত্ৰাই দেশলৈ কিভাৱে একতাৰ ভাৱ কঢ়িয়াই আনিছে সেয়া কয়। গোলাঘাটৰ বিশিষ্ট ব্যক্তি তথা অৱসৰপ্ৰাপ্ত অধ্যাপিকা ড° তৰালি গগৈয়ে মোৰ মাটি মোৰ দেশৰ ওপৰত বক্তব্য  আগবঢায় আৰু ইয়াৰ তাৎপৰ্য ব্যাখ্যা কৰে৷ 

                  অনুস্থানত গোলাঘাটৰ জিলা উন্নয়ন আয়ুক্ত শ্ৰীমতী অৰ্পা বাগলাৰী, গোলাঘাট পৌৰসভাৰ পৌৰনেত্ৰী শ্ৰীমতী দুলুমনি বৰবৰা, দেৰগাঁৱৰ পৌৰনেত্ৰী শ্ৰীমতী ৰূপাঞ্জলী ফুকন, বৰপথাৰৰ পৌৰপতি শ্ৰীযুত সঞ্জীৱ বৰুৱা, সৰুপথাৰৰ পৌৰনেত্ৰী শ্ৰীমতী ঊষা ভিলুৱাৰিয়া, বোকাখাতৰ পৌৰপতি শ্ৰী ৰত্নেশ্বৰ বৰুৱাৰ লগতে পৌৰসভাৰ সমূহৰ কাৰ্য্যবাহী বিষয়া সকল, গোলাঘাটৰ বিশিষ্ট ব্যক্তি সকল উপস্থিত থাকে।

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট

NORTHEAST NEWS INDIA

কাজিৰঙা পৰ্য্যটন ক্ষেত্ৰ পৰ্য্যটক সকলৰ বাবে মুকলি

১৫ অক্টোবৰ, ২০২৩: গোলাঘাট

আজি ইংৰাজী ১৫ অক্টোবৰ ২০২৩ তাৰিখে ৰাজ্যৰ বন আৰু পৰিবেশ ইত্যাদি বিভাগৰ মন্ত্ৰী শ্ৰীযুত চন্দ্ৰমোহন পাটোৱাৰীয়ে কাজিৰঙা পৰ্য্যটন ক্ষেত্ৰ পৰ্য্যটক সকলৰ বাবে মুকলি

কৰে। অনুস্থানৰ আৰম্ভণীতে মন্ত্ৰী গৰাকীয়ে কাজিৰঙা স্থিত P D Strachey পুথিভৰাল উদ্ধোধন কৰে আৰু লগতে কাজিৰঙা ৰাষ্ট্ৰীয় উদ্যানৰ ক্ষেত্ৰ সঞ্চালকালয়ৰ দ্বাৰা প্ৰকাশিত “Eastern Swamp Deer in Kaziranga National Park and Tiger Reserve Assam, India status and Distribution” শীৰ্ষক আৰু শ্রী বুবুল শৰ্মা দ্বাৰা লিখিত “হাতী আৰু মাউত” শীৰ্ষক কিতাপ কেইখনৰ উন্মোচন কৰে। ইয়াৰ পিছতে তেখেতে পৰ্য্যটকৰ বাবে এটা চাইকেল আস্থান মুকলি কৰে। ইয়াৰ লগতে কাজিৰঙা ৰাষ্ট্ৰীয় উদ্যানৰ জীপ ছাফাৰী কেন্দ্ৰটো মুকলি কৰে। সমগ্ৰ অনুস্থাতটোত মন্ত্ৰী গৰাকীৰ লগতে ৰাজ্যৰ কৃষি, পশুপালন ইত্যাদি বিভাগৰ মন্ত্ৰী শ্ৰীযুত অতুল বৰা, গোলাঘাটৰ জিলা আয়ুক্ত ডাঃ পি উদয় প্ৰৱীণ, বোকাখাটৰ মহকুমাধিপতি শ্ৰীমতী চিমি কৰন, গোলাঘাটৰ আৰক্ষী অধীক্ষক শ্ৰীযুত ৰাজেন সিং, প্ৰধান মূখ্য বন সংৰক্ষক তথা বনবল মূৰব্বী (অসম) শ্ৰীযুত এম কে যাদৱ, প্ৰধান বন সংৰক্ষক (বন্যপ্ৰানী) আৰু মুখ্য বন্যপ্ৰানী প্ৰৱন্ধক শ্ৰীযুত সন্দীপ কুমাৰ, কাজিৰঙা ৰাষ্ট্ৰীয় উদ্যানৰ ক্ষেত্ৰ সঞ্চালক সোনালী ঘোষ, কাজিৰঙা ৰাষ্ট্ৰীয় উদ্যানৰ পূব অসম বন সংমণ্ডলৰ প্ৰাধিকাৰী শ্ৰীযুত অৰুণ বিঘ্নেশ, আৰু অন্যান্য বিষয়া সকল উপস্থিত থাকে। অনুস্থানৰ পিছতে মন্ত্ৰীদ্বয়ে মিহিমূখৰ পৰা জীপ ছাফাৰীত অংশগ্ৰহন কৰে। শেষত মন্ত্ৰী মহোদয়ে “বন-সৃষ্টি” আৰু “অসমী” নামৰ কাজিৰঙাস্থিত দুটা Eco Development Committee তথা আত্মসহায়ক গোট আৰু বিবেচন কেন্দ্ৰ মুকলি কৰে।

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট

NORTHEAST NEWS INDIA

মক্ৰং চাহ বাগিছাত মহিলা আৰু শিশু বিকাশ বিভাগৰ দ্বাৰা চাহ বাগিছা অঞ্চলত ''মহিলাৰ নিৰাপত্তা, সুৰক্ষা আৰু সৱলীকৰণৰ '' উদেশ্যৰে এখনি সভা অনুস্থিত

১৪ অক্টোবৰ, ২০২৩: গোলাঘাট

ৰাজ্যৰ মহিলা আৰু শিশু সকলৰ সবৰ্তোপ্ৰকাৰৰ বিকাশত গুৰুত্ব দিয়া ৰাজ্য চৰকাৰে মিছন শক্তিৰ অধীনত লোৱা বিভিন্ন কাৰ্যসূচীৰ অংশ হিচাপি আজি ইংৰাজী ১৪ অক্টোবৰ ২০২৩ তাৰিখে গোলঘাট জিলাৰ মক্ৰং চাহ বাগিছাত মহিলা আৰু শিশু বিকাশ বিভাগৰ দ্বাৰা চাহ বাগিছা অঞ্চলত ''মহিলাৰ নিৰাপত্তা, সুৰক্ষা আৰু সৱলীকৰণৰ '' উদেশ্যৰে এখনি সভা অনুস্থিত

হয়। উক্ত সভাত অসম চৰকাৰৰ বিত্ত আৰু মহিলা শিশু বিকাশ বিভাগৰ মন্ত্ৰী শ্ৰীযুতা অজন্তা নেওঁগ ,  ৰাজ্যসভাৰ সাংসদ শ্ৰী কামাখ্যা প্ৰসাদ তাছা , মহিলা আৰু শিশু বিকাশ বিভাগৰ সঞ্চালক শ্ৰী বিভাষ মোডী, গোলাঘাটৰ জিলা আয়ুক্ত ডাঃ পি উদয় প্ৰবীণ, গোলাঘাট জিলা পৰিষদৰ সভানেত্ৰী শ্ৰীমতী হেলিনা দলে পেগু, গোলাঘাটৰ আৰক্ষী অধীক্ষক শ্ৰীযুত ৰাজেন সিং, সদৰ মহকুমাধিপতি  শ্ৰীমতী পাপৰি দাস,  বিশিষ্ট সমাজকৰ্মী শ্ৰীমতী দেৱপ্ৰদীপ বৰুৱা, আটচাৰ সাধাৰণ সম্পাদক জগদিশ বাৰাইক, বিশিষ্ট সমাজকৰ্মী সঞ্জয় কৃষ্ণ তাঁতী আৰু অনেক  গণ্য মান্য ব্যক্তি সকল উপস্থিত থাকে ।

 অনুস্থানৰ আৰম্ভনিতে চাহ বাগানৰ কিশোৰী আৰু মহিলা সকলৰ দ্বাৰা নাৰী সজাগতা সুৰক্ষা আৰু সবলীকৰণৰ উদেশ্য এক শুভাযাত্ৰা অনুষ্ঠিত হয়। ইয়াৰ পিছত মন্ত্ৰী মহোদয়াই মিছন শক্তিৰ পতাকা আৰু  ষ্টলৰ ফিটা কাটি উদ্ধোধন কৰে । মহিলা আৰু শিশু বিকাশ বিভাগৰ সঞ্চালক বিভাষ মোডীয়ে সভাৰ উদ্বোধনী ভাষণ প্ৰদান কৰে । ভাষনত তেখেতে নাৰী সকলৰ সবলীকৰণ, সুৰক্ষা আৰু নিৰাপত্তাৰ দিশৰ ওপৰত আলোকপাত কৰে। ইয়াৰ পিছতে মন্ত্ৰী মহোদয়াই মহিলাৰ নিৰাপত্তা আৰু সৱলীকৰণৰ প্ৰযোজনীয়তা আৰু চাহ বাগিছাৰ অঞ্চল সমূহৰ মহিলা শিশুৰ সমস্যাৰ আৰু আমাৰ কৰণীয় দিশ সমূহৰ সম্পৰ্কে বক্তব্য দিয়ে।  ইয়াৰ লগতে মহিলা আৰু শিশুসকলৰ স্বাস্থ্যৰ প্ৰতি লবলগীয়া যতনৰ বিষয়টোৰ ওপৰতো গুৰুত্ব আৰোপ কৰে। ৰাজ্যসভাৰ সাংসদ তাচায়ে বাগান অঞ্চলৰ বিভিন্ন সামাজিক সমস্যা সমূহ আৰু বাগান কতৃপক্ষৰ ভূমিকা সম্পৰ্কে মতামত আগবঢ়ায়। ইয়াৰ লগতে চাহবাগান অঞ্চলৰ উন্নয়নৰ কাৰনে চৰকাৰে আগবঢ়োৱা ব্যৱস্থা সম্পৰ্কে অৱগত কৰে।

সভাত গোলাঘাটৰ জিলা আয়ুক্ত ডাঃ পি উদয় প্ৰৱীনে চাহ বাগিছা অঞ্চলৰ মহিলা আৰু গৰ্ভৱতী মহিলাৰ স্বাস্থ্যৰ সমস্যাৰ দিশৰ ওপৰত মতামত আগঢ়ায়। বাগান এলেকাৰ বাসিন্দা সকলৰ আধাৰ আৰু বেংক একাউন্ট সম্পৰ্কীয় সমস্যা সমাধানৰ কাৰণে জিলা প্ৰশাসনে প্ৰয়োজনীয় ব্যবস্থা গ্ৰহন কৰাৰ আশ্বাস দিয়ে।  জিলা আৰক্ষী আয়ুক্ত শ্ৰী ৰাজেন সিঙে চাহবাগিচাৰ মহিলা আৰু কিশোৰ কিশোৰ তথা শিশু সুৰক্ষাৰ দিশতোৰ ওপৰত আলোকপাত কৰি চৰকাৰে লোৱা ব্যৱস্থা সমূহৰ বিষয়ে অৱগত কৰে৷

মক্ৰং চাহবাগিচাকে ধৰি জিলাখনৰ বহু চাহ বাগিচাৰ সহস্ৰাধিক মহিলাকে ধৰি সাধাৰন ৰাইজে আজিৰ সভাত অংশগ্ৰহণ কৰে৷

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট

NORTHEAST NEWS INDIA

নৱম শ্ৰেণীৰ ছাত্ৰ ছাত্ৰী সকলৰ মাজত বিনামূলীয়া বাইচাইকেল বিতৰণ

১৩ অক্টোবৰ, ২০২৩: গোলাঘাট

      অসম চৰকাৰে শৈক্ষিক ক্ষেত্ৰখনত ছাত্ৰ-ছাত্ৰীসকলৰ কল্যাণৰ অৰ্থে লোৱা বিভিন্ন পদক্ষেপসমূহৰ ভিতৰত উল্লেখযোগ্য এক পদক্ষেপ হিচাপে আজি সমগ্ৰ অসমৰ জিলাসমূহত মাননীয় মুখ্যমন্ত্ৰীৰ বিশেষ আঁচনিৰ অন্তৰ্গত নৱম শ্ৰেণীৰ ছাত্ৰ ছাত্ৰী সকলৰ মাজত বিনামূলীয়া বাইচাইকেল বিতৰণ

কৰা হয়৷ এই আঁচনিৰ অধীনত আজি গোলাঘাট জিলাৰ সমন্বয় ক্ষেত্ৰত আয়োজিত কাৰ্যসূচীত মুখ্য অতিথি হিচাপে উপস্থিত থাকে  

 অসম চৰকাৰৰ স্বাস্থ্য আৰু পৰিয়াল কল্যাণ মন্ত্ৰী শ্ৰীযুত কেশৱ মহন্ত ৷ গোলাঘাট জিলাৰ নৱম মান  শ্ৰেণীৰ মুঠ ১২,১৫৩ ছাত্র-ছাত্ৰীক মূখ্যমন্ত্রী বিশেষ আচনিৰ অধীনত আজি চাইকেল প্ৰদান কৰা হয়। অনুষ্ঠানত প্ৰতীকি হিচাপে গোলাঘাট জিলাৰ ৫ গৰাকী ছাত্ৰ ছাত্ৰী, ক্ৰমে কস্তুৰি ফুকন, জয়দ্বীপ মজুমদাৰ, স্বপ্নিল বৰুৱা, অন্বেষা কৌশিক আৰু প্ৰতিভা জয়সোৱালক খুমটাই সমষ্টিৰ বিধায়ক মৃণাল শইকীয়াৰ উপস্থিতিত নিজ হাতে চাইকেল বিতৰণ কৰে মন্ত্ৰী শ্ৰীযুত কেশৱ মহন্তই।

            মূখ্য অতিথি ভাষনত তেখেতে নিজৰ বিদ্যালয়ৰ দিনৰ মধুৰ স্মৃতি সো‌ঁৱৰণ কৰি কয় যে যুগৰ পৰিবৰ্তন হোৱাৰ লগে লগে বিদ্যালয়ত শিক্ষাৰ মান উন্নত কৰাৰ উপৰিও  আন্তঃগাঠনি উন্নত কৰি শিক্ষাৰ মানদণ্ড বৃদ্ধি কৰাত চৰকাৰে বিশেষ গুৰুত্ব প্ৰদান কৰিছে।  তেখেতে উল্লখ কৰে যে নেদাৰলেণ্ডৰ দৰে দেশত আৰু আই আই টিৰ দৰে শিক্ষানুষ্ঠানত  সাধাৰন ৰাইজ, অধ্যাপক আৰু শিক্ষাৰ্থী সকলেও  যাতায়াতৰ বাবে চাইকেল ব্যৱহাৰ কৰে ৷ তেখেতে চৰকাৰী বিদ্যালয়ত মাতৃ ভাষা তথা ইংৰাজী মাধ্যমত শিক্ষা গ্ৰহণৰ প্ৰতি শীঘ্ৰে সুব্যৱস্থা লব বুলিও আশ্বাস প্ৰদান কৰে।

              সভাত বিশিষ্ট অতিথি হিচাপে উপস্থিত থকা খুমটাই বিধান সভা সমষ্টিৰ বিধায়ক মৃণাল শইকীয়াই পুৰণি দিনৰ স্মৃতি ৰোমন্থন কৰি নষ্টালজিক হৈ উল্লেখ কৰে যে  চাইকেল তেতিয়া অভিজাত্যৰ চিন আছিল। তেখেতে কয় যে তেখেতে দৈনিক পাঁচৰ পৰা দহ কিলোমিটাৰ চাইকেল চলায়। গোলকীয় উষ্ণতা নিয়ন্ত্ৰণ আৰু জলবায়ু পৰিৱৰ্তনৰ ক্ষেত্ৰতো চাইকেলে লব পৰা ভূমিকাৰ বিষয়ে তেখেতে ভাষণত কয় । 

              গোলাঘাটৰ জিলা আয়ুক্ত ড০ পি উদয় প্ৰবীনে আদৰণি ভাষণত যাতায়ত, অধ্যয়নৰ সময় বৃদ্ধি, আৰ্থিক সকাহ আৰু পৰিৱেশ তথা স্বাস্থ্য ৰক্ষাৰ ক্ষেত্ৰতো আজি বিতৰন কৰা চাইকেলে কেনে ভূমিকা লব পাৰে তাৰ বিষয়ে ভাষনত উল্লেখ কৰে৷ তেখেতে লগতে আজিৰ অনুষ্ঠানৰ সৌষ্ঠৱ বৃদ্ধি কৰি উপস্থিত থকা গোলাঘাট জিলাৰ অভিভাৱক মন্ত্ৰী শ্ৰীযুত কেশৱ মহন্তক ধন্যবাদ জনায়৷ আজিৰ অনুষ্ঠানত গোলাঘাট জিলা পৰিষদৰ সভানেত্ৰী শ্ৰীমতী হেলিনা দলে পেগু, গোলাঘাট পৌৰসভাৰ সভানেত্ৰী শ্ৰীমতী দুলুমনি বৰবৰা, জিলা উন্নয়ন আয়ুক্ত শ্ৰীমতী অৰ্পা বাগলাৰী, গোলাঘাট জিলা পৰিষদৰ মুখ্য কাৰ্যবাহী বিষয়া শ্ৰী ধীৰাজ দাস,  বিদ্যালয় সমূহৰ পৰিদৰ্শক ড° সমীৰণ বৰা, জিলা প্ৰশাসনৰ বিভিন্ন বিষয়ববীয়া সকল,  গোলাঘাটৰ নেতৃস্থানীয় ব্যক্তিসকল  আৰু ছাত্ৰ - ছাত্ৰী সকলৰ লগতে অভিভাৱক সকল উপস্থিত আছিল l

             

ভাৰপ্ৰাপ্ত জিলা তথ্য আৰু জনসংযোগ বিষয়া, গোলাঘাট৷ NORTHEAST NEWS INDIA

*চাৰিঙীয়া সামূহিক চিকিৎসা কেন্দ্ৰত আয়ুষ্মান ভৱ স্বাস্থ্য মেলা অনুষ্ঠিত*

১১ অক্টোবৰ, ২০২৩

*চাৰিঙীয়া সামূহিক চিকিৎসা কেন্দ্ৰত আয়ুষ্মান ভৱ স্বাস্থ্য মেলা অনুষ্ঠিত*

*উদ্বোধন কৰে খুমটাই বিধানসভা সমষ্টিৰ বিধায়ক শ্ৰীযুত মৃণাল শইকীয়া দেৱে*

গোলাঘাট জিলাৰ চাৰিঙীয়া খণ্ড প্ৰাথমিক চিকিৎসা কেন্দ্ৰৰ অধীনত আজি ইংৰাজী ১১ অক্টোবৰ, ২০২৩ তাৰিখে চাৰিঙীয়া সামূহিক চিকিৎসা কেন্দ্ৰত এখন স্বাস্থ্য মেলাৰ আয়োজন কৰা হয়। স্বাস্থ্য মেলা খন শুভ উদ্বোধন কৰে খুমটাই বিধানসভা সমষ্টিৰ বিধায়ক শ্ৰীযুত মৃণাল শইকীয়া দেৱে।

প্ৰসূতি, শিশু, অসংক্রামক ৰোগ, মেডিচিন বিভাগকে আদি কৰি বিভিন্ন চিকিৎসা সেৱা ৰাইজলৈ আগবঢ়োৱাৰ উদ্দেশ্যেৰে মেলা খনত স্থানীয় চিকিৎসক সকলৰ উপৰিও যোৰহাট চিকিৎসা মহাবিদ্যালয়ৰ পৰা ঔষধ বিভাগৰ বিশেষজ্ঞ 

ডা: অখিল এ টি, প্ৰসূতি বিভাগৰ বিশেষজ্ঞ ডা: নুপুৰ গগৈ, ই এন টি বিভাগৰ ডা: অনন্য ফুকন আৰু ডা: এইহ. সিংহ উপস্থিত থাকে। 

উক্ত স্বাস্থ্য মেলাৰ যোগেদি মুঠ তিনি শতাধিক লোকে চিকিৎসা সেৱা, বিনামূলীয়া ঔষধ আৰু বিভিন্ন স্বাস্থ্য পৰীক্ষাৰ সুবিধা লাভ কৰে। ইয়াৰে ভিতৰত ৯১ গৰাকী গৰ্ভৱতী মহিলা, ৩৪ জন শিশু, ৫৬ জন বয়োজ্যেষ্ঠ জনে চিকিৎসা সেৱা লাভ কৰে। প্ৰসূতি বিভাগত মুঠ ১২৩ গৰাকী মহিলা, ঔষধ বিভাগত ৭৬ জন লোকে আৰু ই এন টি বিভাগত ২০ জন লোকে চিকিৎসা সেৱা লাভ কৰে। 

চিকিৎসা প্ৰদানৰ উপৰিও উপস্থিত ৰাইজক স্বাস্থ্য জনিত বহু পৰামৰ্শ প্ৰদান কৰাৰ উদ্দেশ্যেৰে এখন সজাগতা সভা অনুষ্ঠিত কৰা হয় যত মাতৃ আৰু শিশু স্বাস্থ্য,  সংক্ৰামক - অসংক্রামক ৰোগ, বয়োজ্যেষ্ঠ লোকৰ স্বাস্থ্যৰ যত্ন, মানসিক স্বাস্থ্য, পুষ্টিকৰ খাদ্য, গৰ্ভধাৰণৰ সময়ত লব লগা যত্ন,পৰিয়াল পৰিকল্পনা, যক্ষ্মা, আভা পৰিচয় সংখ্যা, আয়ুষ্মান ভাৰত যোজনাকে আদি কৰি বহু দিশ সামৰি লোৱা হয়।

চাৰিঙীয়া সামূহিক চিকিৎসা কেন্দ্ৰত অনুষ্ঠিত এই স্বাস্থ্য মেলাত বিশেষজ্ঞ চিকিৎসক সকলৰ উপৰিও অন্য স্বাস্থ্য বিষয়া, কমিউনিটি হেলথ অফিচাৰ, চিকিৎসাকৰ্মী সকল, স্বাস্থ্যকৰ্মী সকল, আশা চুপাৰভাইজৰ, আশা কৰ্মী, ৰাষ্ট্ৰীয় স্বস্ত্য অভিযান, গোলাঘাটৰ বিষয়া আদি উপস্থিত থাকে।

সমগ্ৰ দেশব্যাপী চলি থকা আয়ুষ্মান ভৱ অভিযানৰ অংশস্বৰূপে সামূহিক চিকিৎসা কেন্দ্ৰ পৰ্যায়ৰ জিলা খনত এইখন ৮ নং স্বাস্থ্য মেলা।

আজিৰ স্বাস্থ্য মেলা খনৰ শুভ উদ্বোধন অনুষ্ঠানত উপস্থিত থাকে চিকিৎসালয় পৰিচালনা সমিতিৰ সদস্য সকল, চিকিৎসক - চিকিৎসাকৰ্মী, স্বাস্থ্যকৰ্মী আৰু স্থানীয় ৰাইজ।

 NORTHEAST NEWS INDIA