*স্বাস্থ্য সেৱা উৎসৱৰ তৃতীয় দিনা কমাৰবন্ধা আলি খণ্ড প্ৰাথমিক স্বাস্থ্য কেন্দ্ৰ পৰিদৰ্শন বাহ্যিক মূল্যায়নকাৰী শ্ৰী কৈলাশ কাৰ্তিক এনৰ*
গোলাঘাট ০৮ এপ্রিল,২০২৩ঃ স্বাস্থ্য সেৱা উৎসৱৰ তৃতীয় দিনটোত শ্ৰী কৈলাশ কাৰ্তিক এণ, আই এ এছ, সচিব, জনস্বাস্থ্য কাৰিকৰী বিভাগ, মিশ্যন ডাইৰেক্টৰ, স্বচ্ছ ভাৰত অভিযান ( গ্ৰামীণ), মিশ্যন ডাইৰেক্টৰ ( ভাৰপ্ৰাপ্ত), জল জীৱন মিশ্যন, পৰিচালক, নীৰ নিৰ্মল পৰিযোজনায়ে কমাৰবন্ধা আলি খণ্ড প্ৰাথমিক স্বাস্থ্য কেন্দ্ৰ পৰিদৰ্শন কৰি আন্তঃগাথনি, মানৱ সম্পদৰ উপলব্ধতা, বহি: বিভাগ, ঔষধ ভাণ্ডাৰ, ঔষধৰ উপলব্ধতা, প্ৰসৱৰ বাবে উপলব্ধ সুবিধা সমূহ আদিৰ বুজ লয়।
স্বাস্থ্য সেৱা উৎসৱৰ স্মৃতি হিচাপে আজিৰ বাহ্যিক মূল্যায়নৰ দিনটোত কমাৰবন্ধা খণ্ড প্ৰাথমিক স্বাস্থ্য কেন্দ্ৰত শ্ৰী কৈলাশ কাৰ্তিক এনে এজোপা গছপুলি ৰোপনেৰে স্বাস্থ্য কেন্দ্ৰলৈ প্ৰবেশ কৰে।
তেখেতে স্বাস্থ্যকৰ্মী, আশা আৰু আশা ছুপাৰভাইজৰ সকলৰ লগত আলোচনাত সন্মিলিত হৈ গৰ্ভৱতী মহিলা, প্ৰসূতি মহিলা আৰু শিশু সকলে পোৱা সুবিধা সমূহৰ বুজ লয়। এনিমীয়াত ভোগা মহিলাৰ বাবে স্বাস্থ্য কেন্দ্ৰটোৱে ব্লাড ট্ৰান্ছফ্যুজনৰ ব্যৱস্থাৰে এনিমিয়া ৰোধ কৰাৰ ব্যবস্থা লৈছে। চাহ বাগিছাৰ অঞ্চলত পুষ্টিহীনতাত ভোগা লোকৰ সংখ্যা টো অধিক। পুষ্টিহীনতাত ভুগি থকা গৰ্ভৱতি মহিলা সকলে জটিল গৰ্ভাৱস্থাত ভোগে যিয়ে মাতৃ মৃত্যু হাৰ বৃদ্ধি কৰাত যোগদান দিয়ে। পুষ্টিহীনতাত ভোগা গৰ্ভৱতী মহিলা এগৰাকীয়ে এটি ৰুগীয়া বা পুষ্টিহীন সন্তান জন্ম দিয়ে।
উল্লেখ্য যে কমাৰবন্ধা আলি খণ্ড টো গোলাঘাট জিলাৰ সবাতোকৈ বৃহৎ স্বাস্থ্য খণ্ড আৰু ইয়াৰ বাবে এই স্বাস্থ্য কেন্দ্ৰটোত বহি: বিভাগত ৰোগীৰ ভাৰ টো বেছি। কমাৰবন্ধা আলি স্বাস্থ্য খণ্ডৰ অন্তৰ্গত ২৬ খন চাহ বাগান আছে।
বাহ্যিক মূল্যায়নৰ দিশ সমূহ বিচাৰ কৰাৰ ক্ষেত্ৰত শ্ৰী কৈলাশ কাৰ্তিক এনে চিকিৎসালয়খনৰ চাফ - চিকুনতা, নলা - নৰ্দমাৰ ব্যবস্থা, ৰোগীৰ চিকিৎসা সেৱাৰ প্ৰতি প্ৰতিক্ৰিয়া আদিৰ বুজ লয়। তেখেতে প্রসব কক্ষ,পৰীক্ষাগাৰ, প্ৰতিষেধক কক্ষ আৰু স্বাস্থ্য কেন্দ্ৰৰ পৰিসীমা পৰিদৰ্শন কৰাৰ লগতে বৰ্জ্য ব্যৱস্থাপনাৰ বুজ লয়। তেখেতে বিশুদ্ধ খোৱা পানীৰ ওপৰত গুৰুত্ব প্ৰদান কৰি স্বাস্থ্য কৰ্মী সকলক ৰাইজৰ মাজত ইয়াৰ সজাগতা বৃদ্ধিৰ বাবে কাৰ্যসূচী হাতত লোৱাৰ আহ্বান কৰে। তেখেতে উল্লেখ কৰে যে বিশুদ্ধ খোৱা পানীৰ জৰিয়তে ডাইৰীয়া ৰোগ প্ৰতিৰোধ কৰাত সহায় কৰিব।
স্বাস্থ্য সেৱা উৎসৱৰ দ্বাৰা ৬, এপ্ৰিল, ২০২৩ তাৰিখৰ পৰা ৮ এপ্ৰিল, ২০২৩ পৰ্যন্ত অসমৰ ১২৫২ চৰকাৰী চিকিৎসালয় সমূহৰ মূল্যায়ন কৰা হব।
গোলাঘাট জিলাত স্বাস্থ্য সেৱা উৎসৱৰ অন্তৰ্গত মুঠ ৫০ খন চিকিৎসালয়ৰ ভিতৰত প্ৰথম দিনটোত ১৯ খন, দ্বিতীয় দিনা ১১ খন আৰু তৃতীয় দিনটোত ১৩ খন চিকিৎসালয়ত বাহ্যিক মান নিৰ্ধাৰন ( external assessment) সম্পূৰ্ণ হৈছে।
স্বাস্থ্য সেৱা উৎসৱৰ জৰিয়তে চৰকাৰী চিকিৎসালয় সমূহৰ সামগ্ৰিক উন্নতিকৰন, আন্তঃগাথঁনিৰ মানদণ্ডৰ বিকাশ আৰু গুণগত স্বাস্থ্য সেৱা নিশ্চিত কৰাৰ উদ্দেশ্য আগত ৰাখি চিকিৎসালয় সমূহৰ মূল্যায়নৰ ব্যবস্থা হাতত লোৱা হৈছে।
NORTHEAST NEWS INDIA
