উদুলি-মুদুলি গোলাঘাট সমন্বয় ক্ষেত্ৰৰ বাকৰিঃ বিপুল সমাৱেশেৰে অসম সাহিত্য সভাৰ প্ৰতিষ্ঠা দিৱসৰ লাইখুটা স্থাপন,চিৰ চেনেহী গীতেৰে মুখৰিত

উদুলি-মুদুলি গোলাঘাট সমন্বয় ক্ষেত্ৰৰ বাকৰিঃ বিপুল সমাৱেশেৰে অসম সাহিত্য সভাৰ প্ৰতিষ্ঠা দিৱসৰ লাইখুটা স্থাপন,চিৰ চেনেহী গীতেৰে মুখৰিত

------------------------------------

  গোলাঘাট,১৮ ডিচেম্বৰঃ অহা ২৭ ডিচেম্বৰত গোলাঘাট নগৰৰ সমন্বয় ক্ষেত্ৰত উদযাপিত হ'বলগীয়া জাতীয় সংগঠন অসম সাহিত্য  সভাৰ ১০৫ সংখ্যক কেন্দ্ৰীয় প্ৰতিষ্ঠা দিৱসৰ লাইখুটা স্থাপনৰ মাংগলিক কাৰ্য আজি উদুলি-মুদুলি পৰিৱেশত সম্পন্ন হৈ যায় । অসম সাহিত্য সভাৰ কেন্দ্ৰীয় সমিতিৰ বিষয়ববীয়া তথা  আদৰণি সমিতিৰ সাধাৰণ সম্পাদক দিগন্ত কুমাৰ ভূঞা আৰু কাৰ্যকৰী সভাপতি দেৱজিৎ ফুকনে পৰিচালনা কৰা গাম্ভীৰ্যপূৰ্ণ কাৰ্যসূচীত গোলাঘাট জিলাৰ উপায়ুক্ত মৃগেশ নাৰায়ণ বৰুৱা উপস্থিত থাকি আনুষ্ঠানিকভাৱে লাইখুটা স্থাপন কৰে । তেওঁ প্ৰতিষ্ঠা দিৱসৰ পৱিত্ৰ কাৰ্যসূচীত সকলো ৰাইজক অংশগ্ৰহণ কৰি সাফল্যমণ্ডিত কৰি তোলাৰ আহ্বান জনোৱাৰ লগতে জিলা প্ৰশাসনে সকলো ধৰণৰ সহযোগিতা আগবঢ়োৱাৰ কথা ঘোষণা কৰে । ৰাইজৰ বিপুল অংশগ্ৰহণ আৰু শিল্পীসকলৰ চিৰ চেনেহী গীতেৰে মুখৰিত কৰি তোলে গোলাঘাট সমন্বয় ক্ষেত্ৰ । অনুষ্ঠানত গোলাঘাট জিলা সাহিত্য সভাৰ সভাপতি পৱিত্ৰ বৰবৰাই শুভেচ্ছামূলক বক্তব্য আগবঢ়ায় । আদৰণি সমিতিৰ সভাপতি পূৰ্ণ ৰাজখোৱা, গোলাঘাট জিলা ছাত্ৰ সন্থাৰ সভাপতি নিৰঞ্জন সোনোৱাল,জিলা সাহিত্য সভাৰ সম্পাদক বন্তি বৰা, উপ-সভাপতি তফজুল হক বৰবৰা,জিলাখনৰ শাখা সাহিত্য সভা সমূহৰ সভাপতি,সম্পাদক,

বিষয়ববীয়া, ৰাইজে অংশগ্ৰহণ কৰে ।

গোলাঘাট জিলা সাহিত্য সভাৰ উদ্যোগত ,জিলাখনৰ শাখা সাহিত্য সভা সমূহ,বিভিন্ন সংগঠন,অনুষ্ঠান-প্ৰতিষ্ঠানৰ সহযোগত ,গোলাঘাট শাখা সাহিত্য সভা আৰু পশ্চিম গোলাঘাট শাখা সাহিত্য সভাৰ আতিথ্যত  অহা ২৭ ডিচেম্বৰত গোলাঘাট নগৰৰ সমন্বয় ক্ষেত্ৰত দিনজোৰা বিস্তৃত কাৰ্যসূচীৰে গোলাঘাট নগৰৰ সমন্বয় ক্ষেত্ৰত  উদযাপিত  হ'বলগীয়া  অসমৰ ৰাইজৰ আদৰৰ জাতীয় সংগঠন অসম সাহিত্য  সভাৰ কেন্দ্ৰীয়  প্ৰতিষ্ঠা দিৱসৰ প্ৰস্ততি আদৰণি সমিতিয়ে পূৰ্ণ গতিত অব্যাহত ৰাখিছে  ।  প্ৰতিষ্ঠা দিৱস উপলক্ষে ২৭ ডিচেম্বৰ পুৱা প্ৰায় ৮-৩০ বজাত  ১০৫ খন পতাকা উত্তোলন কাৰ্যসূচীত অসম সাহিত্য সভাৰ সভাপতি ড° কুলধৰ শইকীয়া,উপ-সভাপতি মৃণালীনী দেৱী, অসম সাহিত্য সভাৰ প্ৰধান সম্পাদক যাদৱ চন্দ্ৰ শৰ্মা,অসম সাহিত্য সভাৰ প্ৰাক্তন ভাৰপ্ৰাপ্ত সভাপতি প্ৰহ্লাদ চন্দ্ৰ তাচা, প্ৰাক্তন প্ৰধান সম্পাদক পদুম ৰাজখোৱা, কেন্দ্ৰীয় প্ৰতিনিধি,জিলা সাহিত্য সভাৰ সভাপতি, গোলাঘাট জিলাৰ শাখা সাহিত্য সভা সমূহৰ সভাপতি, জাতীয়-জনগোষ্ঠীয় সংগঠনৰ নেতৃত্ব,জ্যেষ্ঠ নাগৰিক,প্ৰবীণ সাংবাদিক,মহাবিদ্যালয়ৰ অধ্যক্ষ আদিয়ে উত্তোলকৰূপে অংশগ্ৰহণ কৰিব । দবা,শঙ্খ,কাঁহ,গায়ন-বায়নৰ ধ্বনীৰে মুখৰিত হ'ব পৱিত্ৰ পতাকা উত্তোলন কাৰ্যসূচী ।  ইয়াৰ পাচতেই অনুষ্ঠিত হ'ব স্মৃতি তৰ্পণ কাৰ্যসূচী । ইয়াৰ পাছতে ১০৫ গৰাকী মহিলাই 'অ' মোৰ আপোনাৰ দেশ' গীত পৰিৱেশন কৰিব। দিনৰ ১১ বজাৰ পৰা অনুষ্ঠিত হ'ব বৰ্ণাঢ্য সাংস্কৃতিক সমাৰোহ আৰু প্ৰতিষ্ঠা দিৱসৰ মুকলি সভা । অসম সাহিত্য সভাৰ সভাপতি ড° কুলধৰ শইকীয়াৰ পৌৰহিত্যত অনুষ্ঠিত হ'বলগীয়া মুকলি সভাত নাগালেণ্ডৰ সৰ্বোচ্চ আৰু সন্মানীয় অভিভাৱক জাতীয় সংগঠন নগা হোহোৰ অধ্যক্ষ  এইচ.কে জিমমীয়ে মুখ্য অতিথিৰূপে অংশগ্ৰহণ কৰিব । মুকলি সভা শুভ উদ্বোধন কৰিব অৰুণাচলৰ বিশিষ্ট লেখক,সাহিত্যিক ,ভাৰতীয় বায়ু সেনাৰ ৰাষ্ট্ৰপতি পুৰস্কাৰপ্ৰাপ্ত অৱসৰপ্ৰাপ্ত উচ্চ পদস্থ বিষয়া মহন্ত পাংগিঙে ।সভাত অসম সাহিত্য সভাৰ উপ-সভাপতি মৃণালিনী দেৱী,অসম চৰকাৰৰ মন্ত্ৰী অজন্তা নেওগ,অতুল বৰা,বিধায়ক বিশ্বজিৎ ফুকন,মৃণাল শইকীয়া,ভবেন্দ্ৰ নাথ ভঁৰালী, সদৌ অসম ছাত্ৰ সন্থাৰ সাধাৰণ সম্পাদক শংকৰ প্ৰসাদ বৰুৱা,অসম জাতীয়তা যুৱ ছাত্ৰ পৰিষদৰ সাধাৰণ সম্পাদক পলাশ চাংমাই, সদৌ অসম জাতীয়তাবাদী যুৱ ছাত্ৰ পৰিষদৰ সাধাৰণ সম্পাদক উদয়ন গগৈ, গোলাঘাট জিলাৰ উপায়ুক্ত মৃগেশ নাৰায়ণ বৰুৱা,আৰক্ষী অধীক্ষক সুমিত শৰ্মা , নুমলীগড় শোধনাগাৰৰ মানৱ সম্পদ বিভাগৰ মুখ্য মহাপ্ৰৱন্ধক কাজল শইকীয়া,উপ-মহাপ্ৰৱন্ধক মিণ্টু সন্দিকৈ, বড়ো, কাৰ্বি,মিছিং আদি সাহিত্য সভা,আটছা,আছা সংগঠনৰ নেতৃত্বই অংশগ্ৰহণ কৰিব । জনগোষ্ঠীয় সাংস্কৃতিক সমাৰোহত বড়ো,কাৰ্বি,মিছিং,ৰাভা,বিহু, উড়িয়া জনগোষ্ঠীয় নৃত্য,মহিলাৰ ভোৰতাল,ঝুমুইৰ,কণ-কণ ছাত্ৰ-ছাত্ৰীৰ প্ৰাৰ্থনা গীত,সত্ৰীয়া নৃত্য  আদিৰে উক্ত দিনা মুখৰিত হ'ব গোলাঘাট সমন্বয় ক্ষেত্ৰৰ বাকৰি  ।

Madhob Gogoi  

NORTHEAST NEWS INDIA