*৩০ অক্টোবৰৰ ভিতৰত ক'ভিডৰ প্ৰথম পালি প্ৰতিষেধক ল'বলৈ গোলাঘাট জিলা প্ৰশাসনৰ ৰাইজৰ প্ৰতি আহ্বান*
অসম চৰকাৰে ক'ভিড স্বাস্থ্য আচঁনিকে ধৰি ৰাজ্য চৰকাৰৰ আন আঁচনিসমূহৰ সুবিধা লাভ কৰাৰ বাবে ক'ভিডৰ প্ৰতিষেধক গ্ৰহণ কৰাটো বাধ্যতামূলক ঘোষণা কৰিছে । গোলাঘাট জিলা প্ৰশাসনেও জিলাখনৰ এতিয়াও প্ৰতিষেধক গ্ৰহণ কৰিবলৈ বাকী থকা লোকসকলক অচিৰেই প্ৰথম পালি প্ৰতিষেধক ল'বলৈ আহ্বান জনাইছে । ক'ভিড প্ৰতিষেধক প্ৰদান ব্যৱস্থাৰ দায়িত্বত থকা অতিৰিক্ত উপায়ুক্ত কুলদীপ হাজৰিকাই জিলাবাসীক অহা ৩০ অক্টোবৰ, শনিবাৰৰ ভিতৰত ওচৰৰ স্বাস্থ্যকেন্দ্ৰত গৈ প্ৰথম পালি প্ৰতিষেধক গ্ৰহণ কৰিবলৈ আহ্বান জনাইছে । আনহাতে যিসকল লোকৰ দ্বিতীয় পালিৰ সময় হৈছে বা সময় উকলি গৈছে তেওঁলোকক অতি সোনকালে প্ৰতিষেধক গ্ৰহণ কৰিবলৈ কোৱা হৈছে । তেওঁ কয় যে জিলা প্ৰশাসন আৰু জিলা স্বাস্থ্য বিভাগে ক'ভিড প্ৰতিৰোধৰ বাবে প্ৰয়াস অব্যাহত ৰাখিছে । কেৱল প্ৰতিষেধক গ্ৰহনেই ইয়াৰ বিৰুদ্ধে প্ৰধান অস্ত্ৰ বুলি তেওঁ মত প্ৰকাশ কৰে । তেওঁ কোনো উৰা বাতৰিত ভোল নগৈ প্ৰতিষেধক গ্ৰহণ কৰি এই যুঁজৰ অংশীদাৰ হ'বলৈ ৰাইজৰ প্ৰতি আহ্বান জনায় । উল্লেখযোগ্য যে ৰাজ্য চৰকাৰৰ অৰুণোদয়, প্ৰাৰ্থনা আদি আঁচনিসমূহৰ সা-সুবিধাসমূহ এতিয়াৰে পৰা ক'ভিডৰ প্ৰতিষেধক গ্ৰহণৰ স্থিতিৰ সৈতে সংযুক্ত কৰা হ'ব । প্ৰতিষেধক গ্ৰহণ নকৰা কোনো লোকে চৰকাৰী আঁচনিৰ সুবিধা লাভ কৰিব নোৱাৰিব । ইফালে জিলাখনত ২৬ অক্টোবৰলৈকে মুঠ ৯,৭৪,৬৯৪ পালি প্ৰতিষেধক প্ৰদান কৰা হৈছে । ইয়াৰে ৭,০৪,২১৬ টা প্ৰথম পালি আৰু ২,৭০,৪৭৮ টা দ্বিতীয় পালি প্ৰতিষেধক ।
কল্পনা ফুকনৰ ৰিপৰ্ট নৰ্থ ইষ্ট নিউজ ইণ্ডিয়া গোলাঘাট ৷
