*মহিলা আৰু ছোৱালীৰ বিৰুদ্ধে সংঘটিত লিংগভিত্তিক হিংসাৰ বিৰুদ্ধে পৰামৰ্শমূলক সভা সম্পন্ন*

জনসংযোগ, গোলাঘাট, প্ৰেছ বিজ্ঞপ্তি নং-৩৬০/২০২২

*মহিলা আৰু ছোৱালীৰ বিৰুদ্ধে সংঘটিত লিংগভিত্তিক হিংসাৰ বিৰুদ্ধে পৰামৰ্শমূলক সভা সম্পন্ন*

গোলাঘাট, ৩ ডিচেম্বৰ : অসম ৰাজ্যিক গ্ৰামীণ জীৱিকা অভিযানৰ গোলাঘাট জিলা অভিযান পৰিচালনা গোট আৰু জিলা সমাজ কল্যাণ বিভাগৰ উদ্যোগত মহিলা আৰু ছোৱালীৰ বিৰুদ্ধে সংঘটিত লিংগভিত্তিক হিংসাৰ বিৰুদ্ধে ২৫ নৱেম্বৰৰ পৰা ১০ ডিচেম্বৰলৈ অব্যাহত থকা ১৬ দিনীয়া অভিযান সন্দৰ্ভত আজি গোলাঘাটৰ জিলা গ্ৰামোন্নয়ন অভিকৰণৰ সভাকক্ষত এখন জিলা পৰ্যায়ৰ পৰামৰ্শমূলক সভা অনুষ্ঠিত হয় । সভাত কৰ্মক্ষেত্ৰত যৌন আতিশয্য আৰু ঘৰুৱা হিংসা আদি বিষয়সমূহ আলোচনা কৰা হয় । সভাত অংশ লোৱা বিভিন্ন বেচৰকাৰী সংস্থাৰ প্ৰতিনিধিয়ে এই সন্দৰ্ভত নিজৰ অভিজ্ঞতাসমূহ বৰ্ণনা কৰে । অনুষ্ঠানত ডি এইচ ই ডব্লিউ, গোলাঘাটৰ তৰফৰ পৰা গোলাঘাট জিলাত মহিলা আৰু ছোৱালীৰ বিৰুদ্ধে সংঘটিত হিংসাৰ ঘটনা আৰু মহিলা আৰু শিশু বিকাশ বিভাগৰ অধীনত মহিলাৰ সুৰক্ষা আৰু নিৰাপত্তা সম্পৰ্কীয় নতুন আঁচনিসমূহৰ বিষয়ে বিতং ব্যাখ্যা আগবঢ়োৱা হয় । সভাত মহিলা আৰু শিশুৰ বিৰুদ্ধে সংঘটিত হিংসা প্ৰতিৰোধ কৰাৰ বাবে প্ৰতিটো বিভাগে ঐক্যবদ্ধভাৱে কাম কৰিবলৈ প্ৰস্তাৱ গ্ৰহণ কৰে । লগতে ঘৰুৱা হিংসা আইন আৰু কৰ্মক্ষেত্ৰত যৌন আতিশয্য প্ৰতিৰোধ আইনৰ ঘটনাসমূহৰ ক্ষেত্ৰত ভুক্তভোগীয়ে যাতে ন্যায় পায় তাৰ বাবে সহযোগিতা আগবঢ়োৱাৰ বাবেও প্ৰস্তাৱ লোৱা হয় । সভাত জিলা গ্ৰামোন্নয়ন অভিকৰণৰ প্ৰকল্প সঞ্চালক, জিলা সমাজ কল্যাণ বিষয়া, শিশু উন্নয়ন প্ৰকল্প বিষয়াসকল, পঞ্চায়ত আৰু গ্ৰামোন্নয়ন বিভাগ আৰু অসম ৰাজ্যিক গ্ৰামীণ জীৱিকা অভিযানৰ সদস্যসকল, ডি এইচ ই ডব্লিউ, অ' এছ চিৰ সদস্যসকল আৰু এন ই এন, চি আই এন আই, সুধাৰ গৃহ, উজ্জ্বলা গৃহ আদি বেচৰকাৰী সংস্থাৰ সদস্যসকল উপস্থিত আছিল । 

*জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA