জনসংযোগ গোলাঘাট প্ৰেছ বিজ্ঞপ্তি নং : ৩০৪/২০২২
*গোলাঘাট জিলাত গাহৰি মাংসৰ বিক্ৰীত নিষেধাজ্ঞা
*
গোলাঘাট, ২২ জুলাই : গোলাঘাট জিলাৰ পূব উন্নয়ন খণ্ড, পদুমনিৰ অন্তৰ্গত বৰকছাৰী গাঁৱক অসম চৰকাৰে আফ্ৰিকান ছোৱাইন ফ্লুৰ অভিকেন্দ্ৰ হিচাপে ঘোষণা কৰাৰ পৰিপ্ৰেক্ষিতত তথা জিলাখনৰ অন্য ঠাইলৈ এই ৰোগৰ প্ৰাদুৰ্ভাৱ ঘটাৰ আশঙ্কা কৰি অতিৰিক্ত জিলা দণ্ডাধীশ কুলদীপ হাজৰিকাই ফৌজদাৰী কাৰ্যবিধিৰ ১৪৪ ধাৰাৰ অধীনত কেতবোৰ নিষেধাজ্ঞা জাৰি কৰিছে । সেই অনুসৰি গোলাঘাট জিলাৰ দৈনিক/সাপ্তাহিক বজাৰসমূহকে ধৰি কোনো ঠাইত গাহৰি, গাহৰিৰ পোৱালী, গাহৰিৰ মাংস আৰু অন্য গাহৰিৰ মাংসৰ পৰা প্ৰস্তুত কৰা সামগ্ৰীৰ বিক্ৰী নিষিদ্ধ ঘোষণা কৰা হৈছে । ৰাষ্ট্ৰীয় ঘাইপথৰ বাহিৰে গাহৰিৰ মাংস আৰু গাহৰিৰ পোৱালী জিলাখনৰ ভিতৰত অথবা আন্তঃজিলা সৰবৰাহ নিষিদ্ধ কৰা হৈছে । পথ, পথাৰ আৰু ব্যক্তিগত অথবা ৰাজহুৱা অন্য মুকলি ঠাইত গাহৰি আৰু গাহৰিৰ পোৱালী চৰি ফুৰাত নিষেধাজ্ঞা আৰোপ কৰা হৈছে । গাহৰিৰ মৃতদেহ মুকলি ঠাই, পথাৰ, নদী, হ্ৰদ আদিত পেলাব নোৱাৰিব । কোনো লোকে ৰোগত আক্ৰান্ত হৈ গাহৰিৰ মৃত্যু হোৱা অথবা গাহৰিৰ দেহত ছোৱাইন ফ্লুৰ লক্ষণ দেখা পালে সেই তথ্য জিলা প্ৰশাসন আৰু পশু চিকিৎসা বিভাগৰ পৰা গোপনে ৰাখিব নোৱাৰিব । আজিৰে পৰা ২২ আগষ্টলৈকে কাৰ্যকৰী হোৱাকৈ এই নিষেধাজ্ঞা আৰোপ কৰা হৈছে । এই নিৰ্দেশ উলংঘা কৰিলে ভাৰতীয় দণ্ডবিধিৰ ১৮৮ ধাৰাৰ অধীনত ব্যৱস্থা গ্ৰহণ কৰা হ'ব বুলি নিৰ্দেশনাটোত কোৱা হৈছে ।
*জিলা তথ্য আৰু জনসংযোগ বিষয়া, গোলাঘাট*
NORTHEAST NEWS INDIA
No comments:
Post a Comment
Welcome Northeast News India