জনসংযোগ, গোলাঘাট প্ৰেছ বিজ্ঞপ্তি নং : ২২৭
*গোলাঘাট জিলাতো ৩ জানুৱাৰীৰ পৰা ১৫ ৰ পৰা ১৮ বছৰ বয়সৰ ছাত্ৰ-ছাত্ৰী, কিশোৰ-কিশোৰীক প্ৰতিষেধক প্ৰদানৰ প্ৰস্তুতি*
গোলাঘাট, ৩১ ডিচেম্বৰঃ গোলাঘাট জিলাৰ উপায়ুক্তৰ কাৰ্যালয়ৰ সভাকক্ষত আজি উপায়ুক্ত মৃগেশ নাৰায়ণ বৰুৱাৰ সভাপতিত্বত জিলাখনৰ কেইবাটাও শিক্ষানুষ্ঠানৰ মুৰব্বী আৰু স্বাস্থ্য বিভাগৰ বিষয়ববীয়াসকলৰ সৈতে এখন গুৰুত্বপূৰ্ণ বৈঠক অনুষ্ঠিত হয় । সভাত অহা ৩ জানুৱাৰীৰ পৰা গোলাঘাট জিলাতো ১৫ ৰ পৰা ১৮ বছৰ বয়সৰ ছাত্ৰ-ছাত্ৰী তথা কিশোৰ-কিশোৰীসকলক ক'ভিড প্ৰতিষেধক প্ৰদান সন্দৰ্ভত বিতংভাৱে আলোচনা কৰা হয় । সেই অনুসৰি অসম চৰকাৰৰ স্বাস্থ্য আৰু পৰিয়াল কল্যান বিভাগ আৰু মাধ্যমিক শিক্ষা বিভাগৰ নিৰ্দেশক্ৰমে গোলাঘাট জিলাৰ বিদ্যালয়সমূহৰ পৰিদৰ্শকৰ সহযোগত জিলাখনৰ শিক্ষানুষ্ঠানসমূহত স্বাস্থ্য বিভাগৰ দলে অহা ৩ জানুৱাৰীৰ পৰা পৰ্যায়ক্ৰমে ব্যাপক প্ৰতিষেধক প্ৰদান অভিযান আৰম্ভ কৰিব । ৩ জানুৱাৰীৰ পৰা ৯ জানুৱাৰীলৈ জিলাখনৰ ১৫ ৰ পৰা ১৮ বছৰ বয়সৰ অধিক ছাত্ৰ-ছাত্ৰী থকা শিক্ষানুষ্ঠানসমূহত স্বাস্থ্য বিভাগৰ দলে গৈ প্ৰতিষেধক প্ৰদান কৰিব । পৰৱৰ্তী সময়ত কনিষ্ঠ মহাবিদ্যালয়, পলিটেকনিক আৰু কাৰিকৰী শিক্ষা প্ৰতিষ্ঠানকে ধৰি সকলো শিক্ষানুষ্ঠানত এই প্ৰতিষেধক প্ৰদান কৰা হ'ব । উপায়ুক্তগৰাকীয়ে কয় যে ২০০৭ চনৰ ৩১ ডিচেম্বৰ বা তাৰ পূৰ্বে জন্মলাভ কৰা সকলো ছাত্ৰ-ছাত্ৰী আৰু কিশোৰ-কিশোৰীয়ে এই প্ৰতিষেধক ল'ব পাৰিব । শিক্ষানুষ্ঠানৰ বাহিৰৰ কিশোৰ-কিশোৰীয়েও এই প্ৰতিষেধক গ্ৰহণ কৰিব পাৰিব বুলি উল্লেখ কৰি তেওঁ প্ৰতিষেধকৰ পালি যাতে নষ্ট নহয় তাৰ প্ৰতি বিশেষভাৱে চকু দিবলৈ নিৰ্দেশ দিয়ে । তেওঁ লগতে ছাত্ৰ-ছাত্ৰী, কিশোৰ-কিশোৰীসকলক বিনাদ্বিধাই প্ৰতিষেধক গ্ৰহণ কৰি ক'ভিডবিৰোধী যুঁজখনৰ অংশীদাৰ হ'বলৈ আহ্বান জনায় । এই অভিযান সফল কৰাৰ বাবে শিক্ষানুষ্ঠানৰ মুৰব্বী, ছাত্ৰ-ছাত্ৰী আৰু অভিভাৱকসকলক প্ৰশাসন তথা স্বাস্থ্য বিভাগৰ দলক সহযোগ কৰিবলৈও উপায়ুক্তগৰাকীয়ে আহ্বান জনায় । এইক্ষেত্ৰত শিক্ষানুষ্ঠানসমূহৰ মুৰব্বীসকলক ছাত্ৰ-ছাত্ৰীৰ তালিকা যুগুত কৰাৰ লগতে তেওঁলোকৰ মাজত সজাগতা সৃষ্টি কৰিবলৈ তেওঁ নিৰ্দেশ দিয়ে । সভাত জিলা উন্নয়ন আয়ুক্ত অৰ্পা বাগলাৰী, অতিৰিক্ত উপায়ুক্ত কুলদীপ হাজৰিকা, স্বাস্থ্য সেৱাৰ যুটীয়া সঞ্চালক ডাঃ অৰুণ চন্দ্ৰ মহন্ত আৰু শিক্ষা তথা স্বাস্থ্য বিভাগৰ বিষয়াসকল উপস্থিত আছিল ।
*জিলা তথ্য আৰু জনসংযোগ বিষয়া, গোলাঘাট*
NORTHEAST NEWS INDIA
