যোৰহাটৰ ৰেড জ'নসমূহত ক'ভিড প্ৰট'কল ভঙ্গকাৰীৰ বিৰুদ্ধে জিলা প্ৰশাসনৰ কঠোৰ পদক্ষেপ

10 July, 2021

জনসংযোগ,যোৰহাট

প্ৰেছ বাৰ্তা নং : ৮৩/২০২১

যোৰহাটৰ ৰেড জ'নসমূহত ক'ভিড প্ৰট'কল ভঙ্গকাৰীৰ বিৰুদ্ধে জিলা প্ৰশাসনৰ কঠোৰ পদক্ষেপ 

যোৰহাট, জুলাই ১০: যোৰহাট জিলা প্ৰশাসনৰ এটা বৃহৎ দলে আজি জিলাখনৰ বিভিন্ন প্ৰান্তত ক'ভিড প্ৰট'কল ভঙ্গকাৰীৰ বিৰুদ্ধে আৰু চুলাই মদ তথা অবৈধ সুৰাৰ বিৰুদ্ধে অভিযান চলায়৷ জিলাখনৰ অভিভাৱক মন্ত্ৰী ড: ৰনোজ পেগু আৰু জিলা উপায়ুক্ত অশোক কুমাৰ বৰ্মনৰ নিৰ্দেশত তিনি জনকৈ অতিৰিক্ত উপায়ুক্তই একেলগে আজি লগত এট বৃহৎ দল লৈ ক'ভিড পজিটিভ বেছি হোৱা ঠাইসমূহত পৰিদৰ্শন কৰি ৰাইজক ক'ভিডৰ চৰকাৰী নীতি নিয়মসমূহ মানি চলিবলৈ নিৰ্দেশ দিয়ে৷

উল্লেখযোগ্য যে,ভগামুখ, চিন্তামণি গড়,জেলেঙীটোপ আদি ঠাইসমূহ বৰ্তমান ক'ভিডৰ ৰেড জ'ন হিচাপে চিনাক্ত কৰা হৈছে৷ সেয়ে এই ঠাইসমূহত ক'ভিড ৰোধ কৰাৰ উদ্দেশ্য আজি অভিযান চলোৱা হয় আৰু এনেধৰনৰ অভিযান আগলৈও প্ৰায়ে চলাই নিয়াৰ বিষয়ে জিলা প্ৰশাসনে অবগত কৰিছে৷

 

ইয়াৰোপৰি  ক'ভিড সংক্ৰমণ বৃদ্ধিৰ সময়চোৱাত অবৈধ সুৰা তথা চুলাই মদৰ আদ্দাসমূহৰ পৰা যাতে অধিক সংক্ৰমণ নহয় তাৰ প্ৰতি লক্ষ্য ৰাখি জিলা প্ৰশাসনে অবৈধ সুৰাৰ বিৰুদ্ধে তীক্ষ্ণ দৃষ্টি ৰাখিছে৷ আজি দলটোৰ লগত যোৰহাট জিলাৰ আবকাৰী অধীক্ষকসহ আবকাৰী বিভাগৰ এটা দলেও অভিযানত অংশগ্ৰহণ কৰে৷ আবকাৰী অভিযানত বহুতো দেশীয় আৰু বিদেশী সুৰা নষ্ট কৰাৰ লগতে অবৈধ সুৰা বিক্ৰী কৰা বহুকেইজন বিক্ৰেতাক ভাবুকি প্ৰদান কৰা হয়৷ আনহাতে অভিযানকালত জিলা প্ৰশাসনৰ বৃহৎ দলটোৱে উক্ত ঠাইসমূহত ক'ভিড সংক্ৰমণ ৰোধৰ ক্ষেত্ৰত ল'বলগীয়া  নীতি নিয়মৰ বিষয়ে আৰু অবৈধ সুৰাৰ বিৰুদ্ধে সজাগতাৰো সৃষ্টি কৰে৷

 আজিৰ অভিযানকালত অতিৰিক্ত উপায়ুক্ত দামোদৰ বৰ্মন, বিশ্বজিৎ ফুকন,অনোজ ব্ৰহ্ম, টীয়ক ৰাজহ চক্ৰ বিষয়া  সৌভিক ভূঁঞা, টীয়ক ৰাজহ চক্ৰ বিষয়া( সংলগ্ন) নিলোৎপলাক্ষী বৰা ,আবকাৰী অধীক্ষক বনানী হোজাই, আবকাৰী পৰিদৰ্শক ইমতিয়াজ আলি, টীয়ক আৰক্ষী প্ৰশাসন, চি আৰ পি এফৰ এটা দল আৰু বহকেইজন বিষয়া কৰ্মচাৰীয়ে সহযোগ কৰে৷

স্বা:

জিলা তথ্য আৰু জনসংযোগ বিষয়া, যোৰহাট

Directorate of Information and Public Relations, Assam