09 April, 2021
প্ৰেছ বিজ্ঞপ্তি নং : ৫৩/২০২১
কাজিৰঙা ৰাষ্ট্ৰীয় উদ্যানত ২০১৯ চনৰ বানপানীৰ সময়ত উদ্ধাৰ কৰা ৩টা গড় পোৱালি মানাহ ৰাষ্ট্ৰীয় উদ্যানলৈ প্ৰেৰণ
গোলাঘাট, ৯ এপ্ৰিল : কাজিৰঙা ৰাষ্ট্ৰীয় উদ্যানত ২০১৯ চনৰ বানপানীৰ সময়ত উদ্ধাৰ কৰা ৩টা গড় পোৱালি আজি মানাহ ৰাষ্ট্ৰীয় উদ্যানলৈ প্ৰেৰণ কৰা হৈছে । বন বিভাগ আৰু IFAW-WTI এ তিনিটা পৃথক স্থানৰ পৰা গড় পোৱালিকেইটা উদ্ধাৰ কৰিছিল । কাজিৰঙা ৰাষ্ট্ৰীয় উদ্যানৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰৰ পৰা গড় পোৱালিকেইটা আজি মানাহলৈ প্ৰেৰণ কৰা হয় । উল্লেখযোগ্য যে ২০১৯ চনৰ জুলাই-আগষ্ট মাহৰ বানপানীৰ সময়ত বিশ্বনাথৰ হাতিমুৰা আৰু কুথুৰীৰ পৰা দুজনী গঁড়ৰ পোৱালি আৰু শ'লমাৰাৰ পৰা এটা মতা গড়ৰ পোৱালি উদ্ধাৰ কৰা হৈছিল । IFAW-WTI ৰ বিশেষজ্ঞ পশু চিকিৎসক ডাঃ ভাস্কৰ চৌধুৰীৰ নেতৃত্বত গড় পোৱালীকেইটা কঢ়িয়াই নিয়া চিকিৎসকৰ দলটোত আছে ডাঃ চামছুল আলী, ডাঃ দাওহাৰো বড়ো আৰু ডাঃ বিশ্বজিৎ বৰুৱা । কাজিৰঙা ৰাষ্ট্ৰীয় উদ্যানৰ সঞ্চালক পি শিৱকুমাৰে কয় যে যোৱা দুবছৰ ধৰি গঁড়ৰ পোৱালীকেইটাক ৰাষ্ট্ৰীয় উদ্যানখনৰ বন্যপ্ৰাণী পুনৰ সংস্থাপন আৰু সংৰক্ষণ কেন্দ্ৰত প্ৰতিপালন কৰি ৰখা হৈছিল । গড় পোৱালিকেইটাৰ খড়্গ ওলাবলৈ ধৰাৰ এই সময়খিনিয়ে পুনৰ সংস্থাপনৰ বাবে উৎকৃষ্ট সময় বুলি তেওঁ উল্লেখ কৰে । কাইলৈ নিচেই পুৱা মানাহত উপস্থিত হ'বলগীয়া দলটোৱে গড় পোৱালিকেইটাক স্বাস্থ্য পৰীক্ষা কৰি এটা নিৰ্দিষ্ট সময়ৰ বাবে নিৰীক্ষণত ৰাখি মানাহ ৰাষ্ট্ৰীয় উদ্যানত মোকলাই দিব ।
জিলা তথ্য আৰু জনসংযোগ বিষয়া, গোলাঘাট
নৰ্থ ইষ্ট নিউজ ইণ্ডিয়া
