জনসংযোগ, গোলাঘাট প্ৰেছ বিজ্ঞপ্তি নং : ১৭৬
*গোলাঘাট জিলাত জল জীৱন অভিযান আৰু মিছন বসুন্ধৰাৰ কাম-কাজৰ বুজ ল'লে অভিভাৱক সচিব অনুৰাগ গোৱেলে*
গোলাঘাট, ৪ অক্টোবৰ : ৰাজ্য চৰকাৰৰ স্বাস্থ্য আৰু পৰিয়াল কল্যান বিভাগৰ প্ৰধান সচিব তথা গোলাঘাট জিলাৰ অভিভাৱক সচিব শ্ৰী অনুৰাগ গোৱেলে আজি জিলাখনৰ বিভিন্ন ঠাইত ৰূপায়িত জল জীৱন অভিযানৰ অধীনৰ কেইবাখনো আঁচনি পৰিদৰ্শন কৰি কাম-কাজৰ বুজ লয় । তেওঁ জনস্বাস্থ্য কাৰিকৰী বিভাগৰ গোলাঘাট সংমণ্ডলৰ অধীনৰ সৰুপথাৰ উপ সংমণ্ডলৰ মৰঙি ব্লকৰ দুলিয়াগাঁও পানী যোগান আঁচনি, বোকাখাত সংমণ্ডলৰ অধীনৰ বিহৰা বাগিচা পানী যোগান আঁচনি, নুমলীগড় পাঁচ নম্বৰ লাইন পানী যোগান আঁচনি আৰু বৰমহৰী পথাৰ পানী যোগান আঁচনিকেইখন পৰিদৰ্শন কৰে । তেওঁ আচঁনিকেইখনৰ অধীনত পানী যোগান ব্যৱস্থা সন্দৰ্ভত বিতংভাৱে বুজ লোৱাৰ লগতে জল জীৱন আঁচনিৰ সফল ৰূপায়ন সুনিশ্চিত কৰিব পৰাকৈ কাম কৰিবলৈ বিষয়া-কৰ্মচাৰীসকলক নিৰ্দেশ দিয়ে । সচিবগৰাকীয়ে ইয়াৰ পিছতেই গোলাঘাট ৰাজহ চক্ৰ বিষয়াৰ কাৰ্যালয়ত মিছন বসুন্ধৰাৰ ৰূপায়ণৰ বিভিন্ন দিশ আলোচনা কৰে । তেওঁ এই অভিলাষী আঁচনিৰ সফল ৰূপায়ন সুনিশ্চিত কৰাৰ বাবে ৰাজহ চক্ৰ বিষয়া তথা কাৰ্যালয়টোৰ আন কৰ্মচাৰীসকলক দায়বদ্ধতাৰে কাম কৰিবলৈ পৰামৰ্শ আগবঢ়ায় । তেওঁ গাঁও পঞ্চায়তৰ কাৰ্যালয়সমূহত বিশেষ শিবিৰ অনুষ্ঠিত কৰি জনসাধাৰণৰ ভূমি সম্পৰ্কীয় বিভিন্ন বিষয়ৰ আবেদনপত্ৰসমূহ সংগ্ৰহৰ ব্যৱস্থা কৰিবলৈ নিৰ্দেশ দিয়ে । বিষয়াগৰাকীয়ে মৰঙি ৰাজহ চক্ৰ বিষয়াৰ কাৰ্যালয়তো মিছন বসুন্ধৰাৰ কাম-কাজৰ বুজ লয় । তেওঁ কমাৰগাঁৱত ড্ৰেগন ফলৰ খেতি কৰি সফল হোৱা খেতিয়ক কৰুনাকান্ত হাজৰিকাৰ কৃষি পামখনো পৰিদৰ্শন কৰে । বিষয়াগৰাকীৰ সৈতে আজিৰ এই পৰিদর্শনকালত জিলা উপায়ুক্ত শ্ৰী মৃগেশ নাৰায়ণ বৰুৱাও উপস্থিত আছিল ।
*জিলা তথ্য আৰু জনসংযোগ বিষয়া, গোলাঘাট*
NORTHEAST NEWS INDIA
No comments:
Post a Comment
Welcome Northeast News India