*গোলাঘাট জিলাত ১৩ আৰু ১৪ জুলাইত গেলামালৰ দোকানকে ধৰি সকলো ব্যৱসায় প্ৰতিষ্ঠান বন্ধ ঘোষণা প্ৰশাসনৰ* *সকলোৱে সহযোগ কৰক, সন্মিলিত প্ৰচেষ্টাতহে আমি ক'ভিডক পৰাজিত কৰিব পাৰিম : উপায়ুক্ত*

12 July, 2021

প্ৰেছ বিজ্ঞপ্তি নং : ১১৮ জনসংযোগ, গোলাঘাট

*গোলাঘাট জিলাত ১৩ আৰু ১৪ জুলাইত গেলামালৰ দোকানকে ধৰি সকলো ব্যৱসায় প্ৰতিষ্ঠান বন্ধ ঘোষণা প্ৰশাসনৰ* 

*সকলোৱে সহযোগ কৰক, সন্মিলিত প্ৰচেষ্টাতহে আমি ক'ভিডক পৰাজিত কৰিব পাৰিম : উপায়ুক্ত* 

গোলাঘাট, ১২ জুলাই : গোলাঘাট জিলাত ক'ভিড 19ৰ সংক্ৰমণ ৰোধ কৰাৰ উদ্দেশ্যে জিলা প্ৰশাসনে ১৩ জুলাই মঙলবাৰ আৰু ১৪ জুলাই বুধবাৰে জিলাখনৰ সকলো দোকান-পোহাৰ বন্ধ ৰখাৰ নিৰ্দেশ দিছে । এই সময়ছোৱাত গাখীৰ বিক্ৰী কেন্দ্ৰ আৰু ফাৰ্মাচীসমূহৰ বাহিৰে গেলামাল, শাক-পাচলি আৰু ফল-মূলৰ দোকানসমূহকে ধৰি সকলো ব্যৱসায় প্ৰতিষ্ঠান বন্ধ থাকিব । জিলা উপায়ুক্ত তথা জিলা দুৰ্যোগ ব্যৱস্থাপনা প্ৰাধিকৰণৰ অধ্যক্ষ শ্ৰীযুত মৃগেশ নাৰায়ণ বৰুৱাই এই সন্দৰ্ভত নিৰ্দেশনা জাৰি কৰিছে । অৱশ্যে *এই সময়ছোৱাত পেট্ৰল পাম্প, গেছ এজেঞ্চি, বেংক, চাহ বাগিচা, উদ্যোগ আৰু অন্য জৰুৰী সেৱাসমূহ পূৰ্বৰ দৰে খোলা থাকিব ।* এই নিৰ্দেশ উলংঘা কৰা লোকৰ বিৰুদ্ধে অসম ক'ভিড19 নিয়ন্ত্ৰণ অধিনিয়ম, দুৰ্যোগ ব্যৱস্থাপনা আইন ২০০৫ আৰু ভাৰতীয় দণ্ডবিধিৰ ১৮৮ ধাৰাৰ অধীনত ব্যৱস্থা গ্ৰহণ কৰা হ'ব বুলি নিৰ্দেশনাটোত কোৱা হৈছে । উপায়ুক্তগৰাকীয়ে ক'ভিডবিৰোধী যুঁজখনত সহযোগ কৰিবলৈ ৰাইজৰ প্ৰতি আহ্বান জনাইছে । তেওঁ কয় যে কেৱল সন্মিলিত প্ৰচেষ্টাতহে আমি এই যুঁজত জয়লাভ কৰিব পাৰিম । তেওঁ অতি প্ৰয়োজন নহ'লে ঘৰৰ পৰা বাহিৰলৈ নোলাবলৈ ৰাইজৰ প্ৰতি আহ্বান জনায় । অন্যথা প্ৰশাসনৰ নিৰ্দেশ উলংঘা কৰা ব্যৱসায়ী অথবা ব্যক্তিৰ বিৰুদ্ধে কঠোৰ আইনী ব্যৱস্থা গ্ৰহণ কৰা হ'ব বুলি তেওঁ সকীয়াই দিয়ে । 

*জিলা তথ্য আৰু জনসংযোগ বিষয়া, গোলাঘাট*