মাস্ক পৰিধান নকৰা লোকৰ বিৰুদ্ধেও গোলাঘাট নগৰৰ বিভিন্ন প্ৰৱেশ পথত বিহা হ'ব জৰিমনা

19 April, 2021

প্ৰেছ বিজ্ঞপ্তি নং : ৫৪/২০২১

গুৱাহাটীৰ পৰা গোলাঘাটলৈ অহা সকলো বাহনৰ যাত্ৰী, চালক-কৰ্মচাৰীৰ কাইলৈৰ পৰা নুমলীগড়ত কোৱিড পৰীক্ষা

মাস্ক পৰিধান নকৰা লোকৰ বিৰুদ্ধেও গোলাঘাট নগৰৰ বিভিন্ন প্ৰৱেশ পথত বিহা হ'ব জৰিমনা

গোলাঘাট, ১৯ এপ্ৰিল : গোলাঘাট জিলাত কোৱিড-19ৰ প্ৰাদুৰ্ভাৱ ৰোধ কৰাৰ উদ্দেশ্যে কাইলৈৰে পৰা জিলাখনলৈ গুৱাহাটীৰ পৰা অহা সকলো বাছ, অন্যান্য বাহন আৰু ব্যক্তিগত বাহনৰ যাত্ৰী আৰু চালক-কৰ্মচাৰীৰ কোৱিড পৰীক্ষা কৰোৱা হ'ব । নুমলীগড়ত গুৱাহাটীৰ পৰা অহা বাহনসমূহ ৰখাই ৰেপিড এন্টিজেন টেষ্ট কৰোৱাৰ বাবে ব্যৱস্থা গ্ৰহণ কৰা হৈছে । আজি জিলা উপায়ুক্তৰ কাৰ্য্যালয়ৰ সভাকক্ষত অনুষ্ঠিত কোৱিড-১৯ৰ স্থিতি আৰু ইয়াৰ বিৰুদ্ধে যুঁজ দিয়াৰ বাবে প্ৰয়োজনীয় প্ৰস্তুতি সন্দৰ্ভত হোৱা এখন পৰ্যালোচনা বৈঠকত জিলা উপায়ুক্ত বিভাষ চন্দ্ৰ মোদীয়ে এই নিৰ্দেশ দিয়ে । তেওঁ ২৪ ঘণ্টাই গুৱাহাটীৰ পৰা অহা বাহনসমূহৰ লোকসকলৰ কোৱিড পৰীক্ষা কৰিবলৈ কঠোৰ নিৰ্দেশ দিয়ে । তেওঁ কয় যে গুৱাহাটীৰ পৰা অহা অধিকাংশ লোকৰ দেহতে কোৱিডৰ সংক্ৰমণ ধৰা পৰাৰ প্ৰতি লক্ষ্য ৰাখি এই সিদ্ধান্ত গ্ৰহণ কৰা হৈছে । লগতে কাইলৈৰে পৰা গোলাঘাট নগৰৰ বিভিন্ন প্ৰৱেশ পথত মাস্ক পৰিধান নকৰা লোকৰ বিৰুদ্ধে এহেজাৰ টকা পৰ্যন্ত জৰিমনা বিহা হ'ব । জিলা উপায়ুক্ত গৰাকীয়ে ইতিমধ্যে জিলাখনৰ বাট-পথ, চিকিৎসালয়, কাৰ্যালয়, বজাৰ আদি সকলো ৰাজহুৱা স্থানত প্ৰতিজন লোকেই তিনিটা তৰপ থকা মাস্ক পিন্ধাটো বাধ্যতামূলক ঘোষণা কৰিছে । মাস্ক নাথাকিলে গামোচা বা অন্য কাপোৰেৰে অন্ততঃ দুটা তৰপ কৰি মুখ আৰু নাক ভালকৈ ঢাকি ল'ব লাগিব । ব্যক্তিগত, চৰকাৰী অথবা ৰাজহুৱা বাহনত ভ্ৰমণ কৰোতেও মাস্ক পৰিধান কৰিব লাগিব । কাৰ্যালয় অথবা যিকোনো কৰ্মস্থলীত মাস্ক পৰিধান কৰাটো বাধ্যতামূলক । কোনো লোকে মাস্ক পৰিধান নকৰিলে  ভাৰতীয় দণ্ডবিধিৰ ১৮৮ ধাৰাৰ অধীনত শাস্তিমূলক ব্যৱস্থা গ্ৰহণ কৰা হ'ব । মাস্ক পৰিধান নকৰা ব্যক্তিয়ে ১০০০ টকা পৰ্যন্ত জৰিমনা ভৰিব লাগিব । উপায়ুক্তগৰাকীয়ে কয় যে সজাগতাইহে এই ৰোগ প্ৰতিৰোধ কৰাত সহায় কৰিব । মাস্ক নিপিন্ধা লোকক ৰেহাই দিয়া নহ'ব বুলি উল্লেখ কৰি তেওঁ কয় যে সময়ে সময়ে তেওঁ নিজেই গৈ বিভিন্ন স্থান পৰিদৰ্শন কৰিব । ইফালে কোৱিডৰ বিৰুদ্ধে যুঁজ দিয়াৰ বাবে জিলা স্বাস্থ্য বিভাগেও প্ৰয়োজনীয় প্ৰস্তুতি গ্ৰহণ কৰিছে ।  ৪৫ বছৰ বয়সৰ উৰ্ধৰ লোকসকলক কোৱিড প্ৰতিষেধক গ্ৰহণ কৰিবলৈ উপায়ুক্তগৰাকীয়ে আহ্বান জনায় । বৈঠকত জিলা স্বাস্থ্য সেৱাৰ যুটীয়া সঞ্চালক অৰুণ চন্দ্ৰ মহন্ত আৰু জিলা প্ৰশাসন তথা স্বাস্থ্য বিভাগৰ ভালেসংখ্যক বিষয়া কৰ্মচাৰী উপস্থিত আছিল । 

জিলা তথ্য আৰু জনসংযোগ বিষয়া, গোলাঘাট

নৰ্থইষ্ট নিউজ ইণ্ডিয়া