Welcome

ৰাজ্য চৰকাৰৰ তৃতীয় আৰু চতুৰ্থ বৰ্গৰ পদৰ পৰীক্ষা : গোলাঘাট জিলাত ১৪৪ ধাৰাৰ অধীনত কেতবোৰ নিষেধাজ্ঞা জাৰি

জনসংযোগ গোলাঘাট  প্ৰেছ বিজ্ঞপ্তি নং : ৩২৬/২০২২

*ৰাজ্য চৰকাৰৰ তৃতীয় আৰু চতুৰ্থ বৰ্গৰ পদৰ পৰীক্ষা : গোলাঘাট জিলাত ১৪৪ ধাৰাৰ অধীনত কেতবোৰ নিষেধাজ্ঞা জাৰি

* 

গোলাঘাট, ২০ আগষ্ট : ৰাজ্যৰ অন্যান্য ঠাইৰ লগতে গোলাঘাট জিলাতো ২১ আগষ্ট, ২৮ আগষ্ট আৰু ১১ ছেপ্টেম্বৰত অনুষ্ঠিত হ'বলগীয়া তৃতীয় আৰু চতুৰ্থ বৰ্গৰ বিভিন্ন পদত নিযুক্তিৰ বাবে হ'বলগীয়া লিখিত পৰীক্ষা মুক্ত, নিকা আৰু স্বচ্ছভাবে তথা সূচাৰুৰূপে সম্পন্ন কৰাৰ উদ্দেশ্যে জিলাখনত ফৌজদাৰী কাৰ্যবিধিৰ ১৪৪ ধাৰাৰ অধীনত কেতবোৰ নিষেধাজ্ঞা আৰোপ কৰা হৈছে । জিলা দণ্ডাধীশ শ্ৰী মৃগেশ নাৰায়ণ বৰুৱাই আজি এই সম্পৰ্কীয় নিৰ্দেশ জাৰি কৰিছে । সেই অনুসৰি পৰীক্ষাৰ দিনকেইটাত জিলাখনত পৰীক্ষা কেন্দ্ৰৰ ১০০ মিটাৰ ব্যাসাৰ্ধৰ ভিতৰত প্ৰাৰ্থী, স্ক্রাইব আৰু পৰীক্ষা পৰিচালনা আৰু নিৰিক্ষণৰ কামত নিয়োজিত বিষয়া-কৰ্মচাৰীৰ বাহিৰে কোনো কাৰণতে অন্য লোকৰ সমাগম হ'ব নোৱাৰিব । পৰীক্ষা হলৰ ভিতৰলৈ মোবাইল ফোন (চুইচ অন বা অফ উভয় মুডত ), স্মাৰ্ট ৱাটছ, হেলথ বেণ্ড, ইলেকট্ৰ'নিক কলম, স্কেনাৰ, ব্লুটুথ ডিভাইছ, এয়াৰ ফোন, মাইক্ৰফোন অথবা সংযোগ স্থাপনৰ ডিভাইছ হিচাপে ব্যৱহাৰ হ'ব পৰা কোনো সামগ্ৰী, ইলেকট্ৰনিক সামগ্ৰী বা প্ৰগ্ৰেম কৰিব পৰা ডিভাইছ চুইচ অফ বা অন কোনো মুডতে ৰাখিব নোৱাৰিব । কেলকুলেটৰ, পেন ড্ৰাইভ, কাগজৰ টুকুৰা, লিখা বা প্ৰিণ্ট কৰা লিখিত সামগ্ৰী অথবা কোনো অসাধু উপায় অৱলম্বন কৰাৰ বাবে ব্যৱহৃত সামগ্ৰী লগত ৰাখিব নোৱাৰিব । 

উল্লেখযোগ্য যে এই তিনিওটা পৰীক্ষাত গোলাঘাট জিলাৰ মুঠ ৪৪,২০৭ গৰাকী প্ৰাৰ্থী অৱতীৰ্ণ হ'ব । ২১ আগষ্টত জিলাখনৰ ২৯টা কেন্দ্ৰত চতুৰ্থ বৰ্গৰ, ২৮ আগষ্টত ৪১টা কেন্দ্ৰত তৃতীয় বৰ্গৰ আৰু ১১ ছেপ্টেম্বৰত চাৰিটা কেন্দ্ৰত চালক পদৰ বাবে লিখিত পৰীক্ষা অনুষ্ঠিত হ'ব । ইতিমধ্যে পৰীক্ষাৰ কেন্দ্ৰীয় পৰ্যবেক্ষক হিচাপে খাদ্য, অসামৰিক যোগান আৰু গ্ৰাহক পৰিক্ৰমা বিভাগৰ সচিব শ্ৰী দেৱজ্যোতি দত্তক নিয়োগ কৰাৰ লগতে প্ৰতিটো কেন্দ্ৰত এজনকৈ পৰ্যবেক্ষক থাকিব । 

*জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA

Assam COVID-19🦠😷 Details 19/08/2022.

Assam COVID-19🦠😷 Details 18/08/2022.0

Welcome

জিলা প্ৰশাসনৰ উদ্যোগত স্বাধীনতা দিৱস উপলক্ষে এন চি চিত পাৰদৰ্শিতা প্ৰদৰ্শন কৰা কেডেটক সম্বৰ্ধনা, চিত্ৰাংকন আৰু ৰচনা প্ৰতিযোগিতাত স্থানপ্ৰাপকক পুৰস্কাৰ প্ৰদান

জনসংযোগ, গোলাঘাট প্ৰেছ বিজ্ঞপ্তি নং : ৩২৫/২০২২

*জিলা প্ৰশাসনৰ উদ্যোগত স্বাধীনতা দিৱস উপলক্ষে এন চি চিত পাৰদৰ্শিতা প্ৰদৰ্শন কৰা কেডেটক সম্বৰ্ধনা, চিত্ৰাংকন আৰু ৰচনা প্ৰতিযোগিতাত স্থানপ্ৰাপকক পুৰস্কাৰ প্ৰদান

*

গোলাঘাট, ১৭ আগষ্ট : দেশৰ ৭৬ সংখ্যক স্বাধীনতা দিৱসৰ সৈতে সংগতি ৰাখি গোলাঘাট জিলা প্ৰশাসনৰ উদ্যোগত আজি নিজৰ ক্ষেত্ৰখনত পাৰদৰ্শিতা প্ৰদৰ্শন কৰা ৰাষ্ট্ৰীয় শিক্ষাৰ্থী বাহিনী চমুকৈ এনচিচিৰ কেডেটসকলক সম্বৰ্ধনা জনোৱাৰ লগতে চিত্ৰাংকন আৰু ৰচনা প্ৰতিযোগিতাত স্থান লাভ কৰা ছাত্ৰ-ছাত্ৰীসকলক পুৰস্কাৰ প্ৰদান কৰা হয় । এই উপলক্ষে জিলা উপায়ুক্তৰ কাৰ্যালয়ৰ সভাকক্ষত জিলা উন্নয়ন আয়ুক্ত অৰ্পা বাগলাৰীৰ সভাপতিত্বত এখন সভা অনুষ্ঠিত হয় । অনুষ্ঠানত জিলা উন্নয়ন আয়ুক্তগৰাকীয়ে নিজৰ নিজৰ ক্ষেত্ৰত পাৰদৰ্শিতা প্ৰদৰ্শন কৰা ছাত্ৰ-ছাত্ৰীসকলক অভিনন্দন জ্ঞাপন কৰে । তেওঁ আত্মবিশ্বাস আৰু প্ৰবল মানসিক উদ্যমেৰে নিজৰ লক্ষ্যপ্ৰাপ্তি তথা এগৰাকী সু-নাগৰিক হোৱাৰ দিশে অগ্ৰসৰ হ'বলৈ শিক্ষাৰ্থীসকলৰ প্ৰতি আহ্বান জনায় । অনুষ্ঠানত ৭৪ আছাম গাৰ্লছ এন চি চিৰ ৯ গৰাকী কেডেট, অধ্যক্ষ, এ এন অ' আৰু চি টি অ'ক সম্বৰ্ধনা জ্ঞাপন কৰা হয় । ২০২২ চনত দিল্লীৰ গণৰাজ্য দিৱসৰ পেৰেডত অংশগ্ৰহন কৰা তথা ২০২১-২২ বৰ্ষত এন চি চিৰ চি চাৰ্টিফিকেট পৰীক্ষাত শীৰ্ষস্থান লাভ কৰা গোলাঘাট কমাৰ্চ কলেজৰ ছাত্ৰী ৰূপশিখা ডেকাৰ লগতে ডি আৰ কলেজৰ ৰজলীন তকবিপি আৰু তুলিকা গগৈ, দিল্লী পাব্লিক স্কুল, নুমলিগড়ৰ স্পৰ্শা হালৈ আৰু ফৰকাটিং কলেজৰ ছাত্ৰী ছানিয়া দাসক সম্বৰ্ধনা জ্ঞাপন কৰা হয়। আনহাতে এন চি চিৰ প্ৰসাৰৰ ক্ষেত্ৰত আগবঢ়োৱা অৱদানৰ বাবে গোলাঘাট অভিযান্ত্ৰিক মহাবিদ্যালয়ৰ অধ্যক্ষ ডঃ সত্যজিৎ পাল, ডি পি এছ, নুমলিগড়ৰ অধ্যক্ষ ইউ চি হাৰগোলা, কমাৰবন্ধা কলেজৰ এ এন অ' লেফটেনেন্ট মীনাক্ষী বৰা আৰু গোলাঘাট ইঞ্জিনিয়াৰিং কলেজৰ চি টি অ' প্ৰনামী ভূঞাক সম্বৰ্ধনা জনোৱা হয় । 

অনুষ্ঠানত হৰ ঘৰ তিৰংগা কাৰ্যসূচীৰ অংশৰূপে জিলা প্ৰশাসনৰ সহযোগত শিক্ষা বিভাগে আয়োজন কৰা চিত্ৰাংকন প্ৰতিযোগিতাত প্ৰথম, দ্বিতীয় আৰু তৃতীয় স্থান লাভ কৰা ক্ৰমে বৰবালি মধ্য ইংৰাজী বিদ্যালয়ৰ গৰিমা গগৈ, ঘিলাধাৰী উচ্চ বুনিয়াদী বিদ্যালয়ৰ স্বপ্না ফুকন আৰু গেলেকি মিকিৰ গাঁও প্ৰাথমিক বিদ্যালয়ৰ শ্ৰেয়া ভৰদ্বাজক পুৰস্কাৰ প্ৰদান কৰা হয় । লগতে ৰচনা প্ৰতিযোগিতাৰ ষষ্ঠৰ পৰা অষ্টম শ্ৰেণী শাখাত জৱাহৰলাল উচ্চ বুনিয়াদী বিদ্যালয়ৰ দীপালী ভূমিজ, পূব দেৰগাঁও কৃষ্ণ ৰমা আদৰ্শ উচ্চ মাধ্যমিক বিদ্যালয়ৰ ভাগ্যস্মিন দত্ত আৰু নাহৰজান উচ্চ বুনিয়াদী বিদ্যালয়ৰ অংকিতা নাইকক ক্ৰমে প্ৰথম, দ্বিতীয় আৰু তৃতীয় পুৰস্কাৰ প্ৰদান কৰা হয়। এই শাখাৰ বিষয় আছিল 'দেশৰ স্বাভিমান জাতীয় পতাকা'। আনহাতে নৱমৰ পৰা দ্বাদশ শ্ৰেণীৰ শাখাত কুৰালগুৰি এইচ এছ স্কুলৰ ভাৰ্গৱী হাজৰিকা, দেৰগাঁও গাৰ্লছ এইচ এছ স্কুলৰ অনামিকা বৰা আৰু ফৰকাটিং জি জে বালিকা বিদ্যালয়ৰ ৰিচা শইকীয়াই ক্ৰমে প্ৰথম, দ্বিতীয় আৰু তৃতীয় স্থান লাভ কৰে । এই শাখাৰ বিষয় আছিল 'স্বাধীনতা সংগ্ৰামত গোলাঘাটৰ অৱদান' । আজিৰ অনুষ্ঠানত অতিৰিক্ত উপায়ুক্তদ্বয় চুলতানা আখটাৰা আহমেদ আৰু কুলদীপ হাজৰিকা, নিৰ্বাচন বিষয়া সুলক্ষণা বৰপাত্ৰগোহাঁই, শিক্ষা বিভাগৰ বিষয়ববীয়া, শিক্ষক-শিক্ষয়িত্ৰী, অভিভাৱক আৰু ছাত্ৰ-ছাত্ৰীসকল উপস্থিত আছিল । অনুষ্ঠানটোৰ আঁত ধৰে জিলা তথ্য আৰু জনসংযোগ বিষয়া পম্পী দেৱীয়ে । 

*জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA

Welcome