https://www.sssgolaghat.com/srimadbhagawat

Golaghat COVID-19🦠😷 Details

Notifications

Golaghat COVID-19🦠😷 Details

Golaghat COVID-19🦠😷 Details

*গোলাঘাট জিলাৰ অভিভাৱক মন্ত্ৰী তথা স্বাস্থ্য মন্ত্ৰী কেশৱ মহন্ত আৰু বিত্ত মন্ত্ৰী অজন্তা নেওগৰ জিলাখনৰ বিভিন্ন বিভাগৰ কাম-কাজৰ পৰ্যালোচনা*

জনসংযোগ, গোলাঘাট প্ৰেছ বিজ্ঞপ্তি নং : ২৩৩

*গোলাঘাট জিলাৰ অভিভাৱক মন্ত্ৰী তথা স্বাস্থ্য মন্ত্ৰী কেশৱ মহন্ত আৰু বিত্ত মন্ত্ৰী অজন্তা নেওগৰ জিলাখনৰ বিভিন্ন বিভাগৰ কাম-কাজৰ পৰ্যালোচনা*

গোলাঘাট, ৪ জানুৱাৰী : গোলাঘাট জিলাৰ অভিভাৱক মন্ত্ৰী তথা স্বাস্থ্য মন্ত্ৰী কেশৱ মহন্ত আৰু বিত্ত মন্ত্ৰী অজন্তা নেওগে আজি জিলা উপায়ুক্তৰ কাৰ্যালয়ৰ সভাকক্ষত জিলাখনৰ বিভিন্ন বিভাগৰ কাম-কাজৰ পৰ্যালোচনা কৰে । মন্ত্ৰী দুগৰাকীয়ে জল জীৱন অভিযান, ১৫ৰ পৰা ১৮ বছৰ বয়সৰ ছাত্ৰ-ছাত্ৰী, কিশোৰ-কিশোৰীক ক'ভিডৰ প্ৰতিষেধক প্ৰদান অভিযান, প্ৰধানমন্ত্ৰী আৱাস যোজনা (নগৰ)ৰ অধীনত গৃহ নিৰ্মাণৰ স্থিতি, কৰ, আবকাৰী, পৰিবহন আদি বিভাগৰ ৰাজহ সংগ্ৰহ আদি বিভিন্ন বিষয় পৰ্যালোচনা কৰে । সভাত অভিভাৱক মন্ত্ৰীগৰাকীয়ে কেন্দ্ৰীয় চৰকাৰৰ ধ্বজাবাহী আঁচনি জলজীৱন অভিযানৰ সফল ৰূপায়ণৰ ক্ষেত্ৰত বিষয়া-কৰ্মচাৰীসকলে সন্মুখীন হোৱা সমস্যা সন্দৰ্ভত বুজ লৈ তেওঁ অভিভাৱক মন্ত্ৰী হিচাপে সকলোখিনি সহায়-সহযোগিতা আগবঢ়াব বুলি আশ্বাস দিয়ে । তেওঁ বিশেষভাৱে ১৫ ৰ পৰা ১৮ বছৰ বয়সৰ ছাত্ৰ-ছাত্ৰী, কিশোৰ-কিশোৰীক ক'ভিডৰ প্ৰতিষেধক প্ৰদান অভিযান সফল কৰাৰ বাবে নিয়াৰিকৈ পৰিকল্পনা যুগুত কৰাৰ নিৰ্দেশ দিয়ে । অহা ৯ জানুৱাৰীৰ ভিতৰত প্ৰতিষেধক প্ৰদান অভিযানৰ নিৰ্ধাৰিত লক্ষ্যত উপনীত হ'ব পৰাকৈ দৈনিক ৪০/৫০ খন বিদ্যালয়ত এই অভিযান চলাবলৈ তেওঁ নিৰ্দেশ দিয়ে । 

সভাত বিত্তমন্ত্ৰী অজন্তা নেওগে কয় যে বিষয়াসকলে মানুহৰ সৈতে এটা সু-সম্পৰ্ক ৰক্ষা কৰক যাতে ৰাইজে কিবা কামৰ বাবে বিচাৰি আহিলে অন্ততঃ এটা নিৰ্দিষ্ট সময়ত তেওঁলোকক লগ ধৰিব পাৰে । তেওঁ কয় যে প্ৰশাসনিক বিষয়াসকলে পেছাদাৰী মানসিকতাৰে কাম কৰিব লাগিব, তেতিয়াহে এখন সৰ্বাংগসুন্দৰ গোলাঘাট গঢ় দিব পৰা যাব । বৰ্তমানৰ চৰকাৰখনে আধৰুৱা আঁচনি চাব নোখোজে বুলিও প্ৰসংগক্ৰমে তেওঁ উল্লেখ কৰে । মন্ত্ৰীগৰাকীয়ে কয় যে ৰাজ্য চৰকাৰে এইবাৰ আন্তঃগাঁঠনি উন্নয়নৰ বাবে ১৫,০০০ কোটি টকা ধার্য কৰিছে । চৰকাৰী বিষয়াসকলৰ সদিচ্ছা থাকিলেহে সকলো উন্নয়নমূলক কাম-কাজৰ সফল ৰূপায়ন সম্ভৱ হ'ব বুলি তেওঁ মত প্ৰকাশ কৰে । সুশাসনৰ ক্ষেত্ৰত গোলাঘাট জিলাখনে যাতে ৰাজ্যৰ ভিতৰতে শীৰ্ষস্থান দখল কৰিব পাৰে তাৰ বাবে সকলোকে দায়বদ্ধতাৰে কাম কৰিবলৈ তেওঁ আহ্বান জনায় । 

সভাত জিলা উপায়ুক্ত মৃগেশ নাৰায়ণ বৰুৱা, বোকাখাত আৰু ধনশিৰি মহকুমাৰ মহকুমাধিপতি আৰু বিভিন্ন বিভাগৰ মুৰব্বী বিষয়াসকল উপস্থিত আছিল ।

*জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA

*নগৰ আন্তঃগাঁঠনি উন্নয়ন পুঁজিৰ অধীনত গোলাঘাট নগৰত ১০ খন আঁচনিৰ আধাৰশিলা স্থাপন বিত্তমন্ত্ৰীৰ**অসম মাইক্ৰ' ফাইনেন্স উদগনি আৰু সকাহ আঁচনিৰ অধীনত গোলাঘাট নগৰৰ ৮৩২ গৰাকী ঋণগ্ৰস্ত মহিলাক চেক্ প্ৰদান*

জনসংযোগ, গোলাঘাট প্ৰেছ বিজ্ঞপ্তি নং : ২৩২

*নগৰ আন্তঃগাঁঠনি উন্নয়ন পুঁজিৰ অধীনত গোলাঘাট নগৰত ১০ খন আঁচনিৰ আধাৰশিলা স্থাপন বিত্তমন্ত্ৰীৰ*

*অসম মাইক্ৰ' ফাইনেন্স উদগনি আৰু সকাহ আঁচনিৰ অধীনত গোলাঘাট নগৰৰ ৮৩২ গৰাকী ঋণগ্ৰস্ত মহিলাক চেক্ প্ৰদান*

গোলাঘাট, ৪ জানুৱাৰী : অসম চৰকাৰৰ বিত্ত আৰু সমাজ কল্যান মন্ত্ৰী অজন্তা নেওগে আজি গোলাঘাট নগৰৰ সমন্বয় পথাৰ ( ৰাজহুৱা খেলপথাৰ ) ত আয়োজিত এটা অনুষ্ঠানত কেন্দ্ৰীয়ভাৱে নগৰ আন্তঃগাঁঠনি উন্নয়ন পুঁজি চমুকৈ চি আই ডি এফৰ অধীনত গোলাঘাট নগৰত ১০ খন আঁচনিৰ আধাৰশিলা স্থাপন কৰে । অনুষ্ঠানত দিয়া ভাষণত তেওঁ কয় যে চি আই ডি এফৰ অধীনত গোলাঘাট নগৰৰ আন্তঃগাঁঠনি উন্নয়নৰ বাবে ৭৭ কোটি টকা অনুমোদন দিয়া হৈছে । ইয়াৰে সৰ্বাধিক পুঁজি খোৱাপানী যোগান আঁচনিৰ বাবে ধার্য কৰা হৈছে বুলি উল্লেখ কৰি তেওঁ কয় যে যমুনাৰ পানী খোৱাৰ উপযোগী কৰি যোগান ধৰাৰ বাবে ১১ কোটি টকাৰ আঁচনিৰ পুঁজি মঞ্জুৰ হৈছে । আন এখন নগৰীয়া পানী যোগান আঁচনিৰ বাবে ৯ কোটি টকা অনুমোদন হৈছে । অৰ্থাৎ মুঠ ৩০ কোটি টকা কেৱল পানী যোগান আঁচনিৰ বাবে ধার্য কৰা হৈছে । ইয়াৰোপৰি গোলাঘাট নগৰৰ বাট-পথ আৰু নলা-নৰ্দমাসমূহ সঠিকভাৱে নিৰ্মান কৰি পানী ওলাই যাব পৰাকৈ উন্নীতকৰণৰ বাবে ২৩ কোটি টকা অনুমোদন দিয়া হৈছে । নগৰ এখনক এখন জিলাৰ দাপোন বুলি উল্লেখ কৰি তেওঁ কয় যে গোলাঘাট নগৰৰ পাৰ্কসমূহৰ সৌন্দৰ্যবৰ্ধন কৰা হ'ব । এই উদ্যানসমূহত গোলাঘাটৰ কলা-সংস্কৃতি প্ৰতিফলিত হ'ব । লগতে গোলাঘাটৰ কলা-সংস্কৃতি আৰু স্বকীয় দিশসমূহ সন্নিৱিষ্ট কৰি গোলাঘাট সমন্বয় পথাৰ (ৰাজহুৱা খেলপথাৰ )ত এখন তোৰণ নিৰ্মান কৰা হ'ব । ইয়াৰ উপৰি গোলাঘাট নগৰৰ মুক্তিধাম শ্মশানত মৃতদেহ সৎকাৰৰ বাবে ইলেক্ট্রিক ব্যৱস্থা কৰা হ'ব । আনহাতে প্ৰায় ২০০ কোটি টকা ব্যয়েৰে নিৰ্মান কৰিবলগীয়া দেৰগাঁৱৰ পৰা ৰঙাজানলৈ পথটো গোলাঘাটৰ জীৱনৰেখাসদৃশ হ'ব বুলি তেওঁ উল্লেখ কৰে । তেওঁ কয় যে ইয়াৰে ৪ কিলোমিটাৰ গোলাঘাট নগৰত অন্তৰ্ভুক্ত হ'ব । সেই অনুসৰি গোলাঘাট নগৰৰ পথসমূহৰো উন্নতি সাধন কৰা হ'ব । তেওঁ কয় যে ষ্টেডিয়াম পথৰ এফালে প্ৰায় ১,৪০০ মিটাৰ চাইকেল চলোৱাৰ ব্যৱস্থা কৰা হ'ব । এৰেঙাপাৰা চাৰিআলিৰ পৰা ধনশিৰি দলঙলৈকে দুয়োফালে চাইকেল চলোৱাৰ ব্যৱস্থা হ'ব আৰু নদীৰ কাষেৰে প্ৰায় ৪০০ মিটাৰ খোজকাঢ়িব পৰাকৈ পদপথৰ ব্যৱস্থা হ'ব তথা দলঙৰো সৌন্দৰ্যবৰ্ধন কৰা হ'ব বুলি তেওঁ কয় ।

আজিৰ অনুষ্ঠানতে মন্ত্ৰীগৰাকীয়ে অসম মাইক্ৰ' ফাইনেন্স উদগনি আৰু সকাহ আঁচনি (ক্ষীপ্ৰ আদায়কাৰী শিতান) ৰ অধীনত গোলাঘাট নগৰৰ ৮৩২ গৰাকী ঋণগ্ৰস্ত মহিলাক চেক্ প্ৰদান কাৰ্যসূচীৰ শুভাৰম্ভ কৰে । চেক্ লাভ কৰা মহিলাসকলৰ প্ৰায় ৬০০ গৰাকী হিতাধিকাৰীয়ে বন্ধন বেংকৰ পৰা ঋণ লৈছিল । তেওঁ ঋণ লোৱা মহিলাসকলক ভৱিষ্যৎ সময়ত ঋণ ল'লে সময়মতে ওভতাই দিবলৈ আহ্বান জনায় । লগতে যি কামৰ বাবে ঋণ লোৱা হয় সেই কামতে ঋণৰ ধন ব্যয় কৰিবলৈ মহিলাসকলৰ প্ৰতি তেওঁ আহ্বান জনায় । গোলাঘাটৰ লীড বেংকসমূহৰ সৈতে আলোচনা কৰি জিলা উপায়ুক্তক বিত্তীয় সাক্ষৰতা সন্দৰ্ভত সজাগতা সৃষ্টি কৰিবলৈও তেওঁ পৰামৰ্শ আগবঢ়ায় । 

উল্লেখযোগ্য যে চি আই ডি এফৰ অধীনত গোলাঘাট নগৰত আজি আধাৰশিলা স্থাপন কৰা প্ৰকল্পসমূহ হ'ল সমন্বয় পথাৰ ( ৰাজহুৱা খেলপথাৰ )ৰ পুনৰনিৰ্মাণ, ট্রেকাৰ আৰু ৪০৭ আস্থানৰ উন্নীতকৰণ, জ্যোতিৰ্ময়ী উদ্যান, শংকৰদেৱ উদ্যান আৰু প্ৰমোদাভিৰাম উদ্যানৰ সৌন্দৰ্যবৰ্ধন আৰু উন্নীতকৰণ, গোলাঘাট স্পৰ্টছ কম্প্লেক্সত দুমহলীয়া ইন্দোৰ ষ্টেডিয়াম নিৰ্মাণ আৰু জিলা পুথিভঁৰাল প্ৰেক্ষাগৃহৰ উন্নীতকৰণ, যমুনা খোৱাপানী যোগান পুখুৰীৰ পুনৰুজ্জীৱিতকৰণ, মুক্তিধাম শ্মশানৰ উন্নীতকৰণ, ২০২১-২২ বৰ্ষত চি আই ডি এফৰ অধীনত গোলাঘাটৰ কেইবাটাও ৱাৰ্ডৰ পথ আৰু নলা-নৰ্দমাৰ উন্নীতকৰণ আদি । 

আজিৰ অনুষ্ঠানত উপায়ুক্ত মৃগেশ নাৰায়ণ বৰুৱা, জিলা উন্নয়ন আয়ুক্ত অৰ্পা বাগলাৰী, জিলা পৰিষদৰ মুখ্য কাৰ্যবাহী বিষয়া ধীৰাজ দাস, গোলাঘাট পৌৰসভাৰ কাৰ্যবাহী বিষয়া মহকুমাধিপতি ডঃ সংগীতা বৰঠাকুৰ, চি আই ডি এফৰ মধ্য অসম সংমণ্ডলৰ কাৰ্যবাহী অভিযন্তা সঞ্জীৱ শৰ্মা, টাউন এণ্ড কাউন্ত্ৰী প্লেনিং, গোলাঘাটৰ উপ-সঞ্চালক বিপুল শইকীয়া, এল ডি এম সজীৱ কুমাৰ বৰা আৰু প্ৰশাসনৰ বিষয়া, বিভিন্ন বেংকৰ প্ৰতিনিধি, হিতাধিকাৰীসকল উপস্থিত আছিল ।

 *জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA

*গোলাঘাট জিলাৰ শিক্ষানুষ্ঠান পৰিদৰ্শন কৰি প্ৰতিষেধক প্ৰদান ব্যৱস্থাৰ বুজ ল'লে স্বাস্থ্যমন্ত্ৰী কেশৱ মহন্ত আৰু বিত্তমন্ত্ৰী অজন্তা নেওগে**ফেব্ৰুৱাৰী মাহৰ ভিতৰত ৰাজ্যৰ ১৫ ৰ পৰা ১৮ বছৰ বয়সৰ ছাত্ৰ-ছাত্ৰীসকলক দুপালি প্ৰতিষেধক প্ৰদানৰ লক্ষ্য নিৰ্দ্ধাৰণ*

জনসংযোগ, গোলাঘাট প্ৰেছ বিজ্ঞপ্তি নং : ২৩১

*গোলাঘাট জিলাৰ শিক্ষানুষ্ঠান পৰিদৰ্শন কৰি প্ৰতিষেধক প্ৰদান ব্যৱস্থাৰ বুজ ল'লে স্বাস্থ্যমন্ত্ৰী কেশৱ মহন্ত আৰু বিত্তমন্ত্ৰী অজন্তা নেওগে*

*ফেব্ৰুৱাৰী মাহৰ ভিতৰত ৰাজ্যৰ ১৫ ৰ পৰা ১৮ বছৰ বয়সৰ ছাত্ৰ-ছাত্ৰীসকলক দুপালি প্ৰতিষেধক প্ৰদানৰ লক্ষ্য নিৰ্দ্ধাৰণ*

গোলাঘাট, ৪ জানুৱাৰী : স্বাস্থ্যমন্ত্ৰী তথা গোলাঘাট জিলাৰ অভিভাৱক মন্ত্ৰী কেশৱ মহন্তই আজি গোলাঘাট জিলাৰ ৰঙাজান ডনবস্ক' হাইস্কুল আৰু গোলাঘাট চৰকাৰী বেজবৰুৱা উচ্চতৰ মাধ্যমিক বিদ্যালয় পৰিদৰ্শন কৰি ১৫ ৰ পৰা ১৮ বছৰ বয়সৰ ছাত্ৰ-ছাত্ৰীৰ ক'ভিড প্ৰতিষেধক প্ৰদান ব্যৱস্থাৰ বুজ লয় । গোলাঘাট চৰকাৰী বেজবৰুৱা উচ্চতৰ মাধ্যমিক বিদ্যালয় পৰিদৰ্শনৰ সময়ত মন্ত্ৰীগৰাকীৰ সৈতে বিত্তমন্ত্ৰী অজন্তা নেওগো উপস্থিত আছিল ।  স্বাস্থ্যমন্ত্ৰীগৰাকীয়ে প্ৰতিষেধক প্ৰদান কৰোঁতে ছাত্ৰ-ছাত্ৰীসকলৰ সবিশেষ সন্নিৱিষ্ট কৰি তালিকা যুগুত কৰিবলৈও স্বাস্থ্য বিভাগক নিৰ্দেশ দিয়ে, যাতে যিকোনো পৰিস্থিতিত ছাত্ৰ অথবা অভিভাৱকৰ সৈতে যোগাযোগ কৰিব পৰা যায় । পাছত সাংবাদিকৰ আগত তেওঁ কয় যে অহা ফেব্ৰুৱাৰী মাহৰ ভিতৰত ১৫ ৰ পৰা ১৮ বছৰ বয়সৰ ছাত্ৰ-ছাত্ৰীসকলক দুপালি প্ৰতিষেধক দি সম্পূৰ্ণ কৰাৰ লক্ষ্য নিৰ্ধাৰণ কৰা হৈছে যাতে ছাত্ৰ-ছাত্ৰীসকলে দুয়োপালি প্ৰতিষেধক লৈ মাৰ্চ মাহৰ পৰীক্ষাত বহিব পাৰে । আনহাতে অসমত এতিয়ালৈকে এজনো লোকৰ দেহত অমিক্ৰণৰ সংক্ৰমণ ধৰা পৰা নাই বুলি উল্লেখ কৰি তেওঁ কয় যে বিদেশৰ পৰা অহা লোকসকল ক'ভিড নিগেটিভ হ'লেও তেওঁলোকক এসপ্তাহৰ বাবে কোৱাৰেন্টাইন কৰাৰ ব্যৱস্থা কৰা হৈছে । সাত দিনত তেওঁলোকক দুবাৰ ক'ভিড পৰীক্ষা কৰা হয় বুলি তেওঁ উল্লেখ কৰে । এইবাৰ শংকিত হোৱাতকৈ অধিক সতৰ্ক হোৱাৰহে প্ৰয়োজন আছে বুলি মন্তব্য কৰি তেওঁ ক'ভিডৰ এই উৎপৰিৱৰ্তিত ৰূপ অমিক্ৰণৰ সংক্ৰমণ এবাৰ হ'লে ইয়াৰ প্ৰাদুৰ্ভাৱ পূৰ্বতকৈ তীব্ৰ গতিত হ'ব বুলি তেওঁ আশংকা প্ৰকাশ কৰে । অৱশ্যে তেওঁ অমিক্ৰনক লৈ সৃষ্টি হ'ব পৰা পৰিস্থিতিৰ জোৰা মৰাৰ বাবে স্বাস্থ্য বিভাগ সাজু আছে বুলিও মত প্ৰকাশ কৰে । তেওঁ কয় যে ৰাজ্যখনত এনে পৰিস্থিতিৰ জোৰা মৰাৰ বাবে ২,৬০০ খন অক্সিজেনৰ সুবিধা থকা বিচনা আৰু ১০০০ খন আই চি ইউ বিচনাকে ধৰি মুঠ ৯,০০০ খন বিচনা সাজু কৰি ৰখা হৈছে । ইয়াৰ উপৰি এসপ্তাহৰ ভিতৰত ২৫,০০০ বিচনা সাজু কৰিব পৰাকৈ ব্যৱস্থা গ্ৰহণ কৰা হৈছে বুলি তেওঁ কয় । 

 *জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA