*গোলাঘাট জি পি এছ এছৰ অনুজ্ঞাপত্ৰ প্ৰত্যাহাৰৰ নিৰ্দেশ বাতিল*

জনসংযোগ, গোলাঘাট, প্ৰেছ বিজ্ঞপ্তি নং ৩৯৮/২০২৩

*গোলাঘাট জি পি এছ এছৰ অনুজ্ঞাপত্ৰ প্ৰত্যাহাৰৰ নিৰ্দেশ বাতিল*

গোলাঘাট, ২২মাৰ্চ : গোলাঘাট জিলা প্ৰশাসনে গাঁও পঞ্চায়ত পৰ্যায়ৰ সমবায় সমিতি, মেচাৰ্চ গোলাঘাট জি পি এছ এছৰ ছাব-হ'লছেল আৰু খুচুৰা উভয় অনুজ্ঞাপত্ৰ প্ৰত্যাহাৰৰ নিৰ্দেশ বাতিল কৰিছে আৰু অহা মে' মাহৰ পৰা পুনৰ অনুজ্ঞাপত্ৰ ব্যৱহাৰ কৰাৰ অনুমতি প্ৰদান কৰিছে । জিলা খাদ্য, অসামৰিক যোগান আৰু গ্ৰাহক পৰিক্ৰমা বিভাগৰ দায়িত্বত থকা অতিৰিক্ত উপায়ুক্তই জাৰি কৰা নিৰ্দেশনাটোত কোৱা হৈছে যে তদন্তকাৰী বিষয়া আৰু বিভাগৰ পৰিদৰ্শক বিনায়ম কৃষ্ণই দিয়া প্ৰতিবেদন আৰু পৰামৰ্শাৱলী তথা সমবায় সমিতিখনৰ নৱনিৰ্বাচিত অধ্যক্ষ আৰু সচিবে দাখিল কৰা আবেদন, শপতনামা, নৱনিৰ্বাচিত সঞ্চালকমণ্ডলী আৰু এই গোচৰৰ সৈতে জড়িত বিভিন্ন দিশ পৰ্যবেক্ষণৰ অন্তত এই নিৰ্দেশ জাৰি কৰা হৈছে । নৱনিৰ্বাচিত সঞ্চালকমণ্ডলীয়ে দায়িত্বভাৰ লোৱাৰ লগতে সমিতিখনত এগৰাকী চৰকাৰী সচিব নিযুক্তি দিয়াৰ পিছতেই গোলাঘাট জিলাৰ উপায়ুক্তই পূৰ্বৰ অনুজ্ঞাপত্ৰ প্ৰত্যাহাৰৰ নিৰ্দেশ বাতিল কৰে । সচিবগৰাকীক ছাব-হ'লছেল আৰু খুচুৰা উভয় শাখাতে পাৰ্মিট বুক, মজুতকৰণ আৰু বিক্ৰীৰ পঞ্জীয়ন বহী প্ৰস্তুত কৰি মে' মাহৰ বাবে ৰাষ্ট্ৰীয় খাদ্য সুৰক্ষা আঁচনিৰ চাউল মজুতকৰণৰ বাবে যাৱতীয় ব্যৱস্থা গ্ৰহণৰ নিৰ্দেশ দিয়া হৈছে ।   মে' মাহৰ পৰা পৰৱৰ্তী তিনি মাহৰ বাবে সমিতিখনক পৰীক্ষামূলকভাবে কাম-কাজ চলোৱাৰ নিৰ্দেশ দিয়া হৈছে । এই সময়ছোৱাত অত্যাৱশ্যকীয় সামগ্ৰী আইন ১৯৫৫ ৰ কোনো দফা উলংঘা কৰিলে সমবায় সমিতিখনৰ অনুজ্ঞাপত্ৰ বাতিল কৰা হ'ব বুলি নিৰ্দেশনাটোত কোৱা হৈছে । 

*জনসংযোগ, গোলাঘাট*

NORTHEAST NEWS INDIA