*গোলাঘাটত সু-শাসন দিৱস পালন, কৰ্মশালা আৰু বিশেষ গাঁওসভা সম্পন্ন*

‌জনসংযোগ গোলাঘাট প্ৰেছ বিজ্ঞপ্তি নং ৩৬৪/২০২২

*গোলাঘাটত সু-শাসন দিৱস পালন, কৰ্মশালা আৰু বিশেষ গাঁওসভা সম্পন্ন*

গোলাঘাট, ২৩ ডিচেম্বৰ : গোলাঘাট জিলা প্ৰশাসনৰ উদ্যোগত আজি গোলাঘাট আৱৰ্ত ভৱনৰ সভাকক্ষত সু-শাসন সপ্তাহৰ সৈতে সংগতি ৰাখি এখনি কৰ্মশালা অনুষ্ঠিত হয় । উক্ত কৰ্মশালাত মুখ্য অতিথি হিচাপে উপস্থিত থাকে গোলাঘাটৰ হেমপ্ৰভা বৰবৰা গাৰ্লছ কলেজৰ অৱসৰপ্ৰাপ্ত প্ৰবক্তা শিৱ প্ৰসাদ বৰা । জিলা পৰিষদৰ মুখ্য কাৰ্যবাহী বিষয়া ধীৰাজ দাস, অতিৰিক্ত উপায়ুক্ত কুলদীপ হাজৰিকা আৰু ডঃ সংগীতা বৰঠাকুৰৰ লগতে কৰ্মশালাত প্ৰায় প্ৰতিটো বিভাগৰ জিলা পৰ্যায়ৰ মুৰব্বী বিষয়াসকলে অংশগ্ৰহণ কৰে । কৰ্মশালাত সু-প্ৰশাসন ব্যৱস্থাৰ অন্যতম স্তম্ভস্বৰূপ স্বচ্ছতা আৰু দায়বদ্ধতাৰ ওপৰত মুখ্য অতিথিগৰাকীয়ে বিতংভাবে আলোকপাত কৰে । লগতে প্ৰশাসন ব্যৱস্থাক ৰাইজৰ ওচৰ চপাই নিব পৰাকৈ জনসাধাৰণৰ অনুকূল কৰি গঢ় দিয়াৰ ওপৰত বিভিন্নজনে মত প্ৰকাশ কৰে । আজিৰ কৰ্মশালাত কামৰ গতি আৰু ধাৰাবাহিকতাক অক্ষুণ্ণ ৰাখি অধিক ত্বৰান্বিত কৰাৰ সন্দৰ্ভতো আলোচনা কৰা হয় যাতে সমান্তৰালভাবে উন্নয়নৰ গতিও ক্ষীপ্রতৰ হয় । গোলাঘাটৰ বাবে ভিজন ডকুমেণ্ট প্ৰস্তুত কৰা সন্দৰ্ভতো সভাত আলোচনা কৰা হয় । উল্লেখযোগ্য যে সু-শাসন সপ্তাহৰ সৈতে সংগতি ৰাখি গোলাঘাট জিলা প্ৰশাসন আৰু বিভিন্ন বিভাগৰ উদ্যোগত ভালেমান কাৰ্যসূচী গ্ৰহণ কৰা হৈছে । ভাৰতৰ ভূতপূৰ্ব প্ৰধানমন্ত্ৰী ভাৰত ৰত্ন অটল বিহাৰী বাজপেয়ীৰ জন্মদিৱসৰ দিনা অৰ্থাৎ ২৫ ডিচেম্বৰৰ দিনটোত প্ৰতি বছৰে এই দিৱস পালন কৰা হয় । ২৫ ডিচেম্বৰলৈ সপ্তাহজোৰা কাৰ্যসূচীৰে পালন কৰা চলিত বৰ্ষৰ সু-শাসন সপ্তাহৰ মূল বিষয়বস্তু হৈছে "গাওঁ অভিমূখে প্ৰশাসন"। প্ৰশাসন ব্যৱস্থাত মূলতঃ অংশীদাৰিত্ব, দায়বদ্ধতা, স্বচ্ছতা আৰু জবাবদিহিতা আদিৰ দৰে বিষয়সমূহ সুনিশ্চিত কৰি জনসাধাৰনক এই সন্দৰ্ভত সজাগ কৰাৰ উদ্দেশ্যে এই দিৱস তথা সপ্তাহ পালন কৰা হয় । এই দিৱস পালনৰ আন এটা উদ্দেশ্য হ'ল ৰাইজক চৰকাৰৰ ওচৰ চপাই আনি প্ৰশাসনযন্ত্ৰ নিয়াৰিকৈ পৰিচালনা কৰাৰ ক্ষেত্ৰত জনসাধাৰণৰ অংশীদাৰিত্ব নিশ্চিত কৰা । গোলাঘাট জিলাত এই সপ্তাহ তথা দিৱসৰ সৈতে সংগতি ৰাখি পঞ্চায়ত আৰু গ্ৰামোন্নয়ন বিভাগৰ উদ্যোগত বিশেষ গাঁওসভা অনুষ্ঠিত কৰাৰ লগতে বিভিন্ন বিভাগৰ উদ্যোগত ৰাইজৰ অভাৱ-অভিযোগৰ বুজ লোৱাৰ লগতে সমস্যাসমূহৰ সমাধানৰ প্ৰয়াস চলোৱা হৈছে । 

*জিলা তথ্য আৰু জনসংযোগ বিষয়া, গোলাঘাট*

NORTHEAST NEWS INDIA