28 April, 2021
প্ৰেছ বিজ্ঞপ্তি নং : ৬৩/২০২১
গোলাঘাট নিৰ্বাচন জিলাত ভোটগননাৰ বাবে সাজু জিলা প্ৰশাসন
ভোটগননা প্ৰক্ৰিয়াত জড়িত সকলো বিষয়া-কৰ্মচাৰীৰে ক'ভিড পৰীক্ষা কৰাটো বাধ্যতামূলক : উপায়ুক্ত
৬টা ভোটগননা কক্ষত ৩৩ খনকৈ টেবুলত হ'ব গননা
গোলাঘাট, ২৮ এপ্ৰিল : গোলাঘাট নিৰ্বাচন জিলাৰ অধীনৰ ৯৫-গোলাঘাট আৰু ৯৬-খুমটাই সমষ্টিৰ বাবে অহা ২ মে'ত হ'বলগীয়া ভোটগননাৰ বাবে জিলা প্ৰশাসনে সকলো প্ৰস্তুতি সম্পূৰ্ণ কৰিছে । জিলা উপায়ুক্ত তথা জিলা নিৰ্বাচন বিষয়া বিভাষ চন্দ্ৰ মোদীয়ে আজি উপায়ুক্তৰ কাৰ্য্যালয়ৰ সভাকক্ষত অনুষ্ঠিত এখন সভাত ভোটগননাৰ প্ৰস্তুতিৰ বুজ লয় । তেওঁ ভোটগননাৰ দিনা ক'ভিডৰ স্বাস্থ্য বিধিসমূহ কঠোৰ ভাৱে পালন কৰাৰ লগতে ভোটগ্ৰহণৰ দৰে ভোটগণনাও শান্তিপূৰ্ণভাৱে আৰু সুচাৰুৰূপে সম্পন্ন হ'ব বুলি আশা প্ৰকাশ কৰে । তেওঁ কয় যে ভোটগননা প্ৰক্ৰিয়াত জড়িত সকলো বিষয়া-কৰ্মচাৰীৰে ক'ভিড পৰীক্ষা কৰাটো বাধ্যতামূলক কৰা হৈছে । লগতে ভোটগননা কেন্দ্ৰসমূহত শাৰীৰিক ব্যৱধান বজাই ৰখাৰ বিষয়টোত তেওঁ গুৰুত্ব আৰোপ কৰে । শ্ৰীমোদীয়ে ভোটগননা সুচাৰুৰূপে সম্পন্ন কৰাৰ ক্ষেত্ৰত সকলোৰে সহায়-সহযোগিতা কামনা কৰে । উল্লেখযোগ্য যে গোলাঘাট ৰেছিডেন্সিয়েল গাৰ্লছ পলিটেকনিকত ভোটগণনাৰ বাবে প্ৰয়োজনীয় সকলো প্ৰস্তুতি গ্ৰহণ কৰা হৈছে । সেইদিনা ৬টা ভোটগননা কক্ষত ৩৩ খনকৈ টেবুলত হ'ব ভোটগননা কৰা হ'ব । প্ৰতিটো সমষ্টিৰ বাবে দুটাকৈ ভোটগণনা কক্ষ আৰু এটাকৈ পষ্টেল বেলট ভোটগননা কক্ষ থাকিব । প্ৰতিটো কক্ষত ৭ খনকৈ টেবুলত ভোটগননা কৰা হ'ব । গোলাঘাট সমষ্টিৰ পষ্টেল বেলট গণনা কক্ষত ৩ খন আৰু খুমটাই সমষ্টিৰ পষ্টেল বেলট গণনা কক্ষত ২ খন টেবুল থাকিব । ভোটগননা কক্ষত পুৱা চাৰে ৭ বজাৰ ভিতৰত সকলো ভোটগননাকাৰী বিষয়া- কৰ্মচাৰী প্ৰৱেশ কৰিব লাগিব । ভোটগননাৰ বাবে ১৮৭ গৰাকী ভোটগননা চুপাৰভাইজৰ, ভোটগননা সহকাৰী আৰু মাইক্ৰ' অবজাৰ্ভাৰ নিয়োগ কৰা হৈছে আৰু পৰ্যায়ক্ৰমে তেওঁলোকক প্ৰশিক্ষণ প্ৰদান কৰি থকা হৈছে ।স্মৰ্তব্য যে যোৱা ২৭ মাৰ্চত প্ৰথম পৰ্যায়ত গোলাঘাট নিৰ্বাচন জিলাৰ বাবে হোৱা ভোটগ্ৰহনৰপৰা ই ভি এম সমূহ গাৰ্লছ পলিটেকনিকৰ ষ্ট্ৰং ৰুমত ব্যাপক নিৰাপত্তা ব্যৱস্থাৰ মাজত ৰখা হৈছে । গোলাঘাট নিৰ্বাচন জিলাত এইবাৰৰ নিৰ্বাচনত প্ৰায় ৮০শতাংশ ভোটদান হৈছিল ।
জিলা তথ্য আৰু জনসংযোগ বিষয়া, গোলাঘাট
NORTHEAST NEWS INDIA
No comments:
Post a Comment
Welcome Northeast News India